ಪಾಕಿಸ್ತಾನ ನಡೆ: ಚೀನಾ ಮೌನ

ಬೀಜಿಂಗ್: ಗಿಲ್ಗಿಟ್–ಬಾಲ್ಟಿಸ್ತಾನದ ಮೇಲೆ ಆಡಳಿತಾತ್ಮಕ ಅಧಿಕಾರ ಚಲಾಯಿಸಲು ಮುಂದಾಗಿರುವ ಪಾಕಿಸ್ತಾನದ ನಡೆ ಬಗ್ಗೆ ಚೀನಾ ನೇರವಾಗಿ ಪ್ರತಿಕ್ರಿಯಿಸಿಲ್ಲ.

ವಿವಾದಿತ ಪ್ರದೇಶದ ಮುಖಾಂತರವೇ ಚೀನಾ–ಪಾಕಿಸ್ತಾನ ಆರ್ಥಿಕ ಕಾರಿಡಾರ್‌ (ಸಿಪಿಇಸಿ) ಹಾದುಹೋಗುತ್ತದೆ. ಭಾರತ–ಪಾಕ್ ನಡುವಿನ ಕಾಶ್ಮೀರ ಸಮಸ್ಯೆ ಬಗೆಹರಿಯಬೇಕು ಎಂಬುದು ಚೀನಾದ ನಿಲುವು. ಹೀಗಾಗಿ ಯೋಜನೆ ಮೇಲೆ ಈ ನಡೆ ಯಾವುದೇ ಪರಿಣಾಮ ಬೀರುವುದಿಲ್ಲ ಎಂದು ಚೀನಾ ಹೇಳಿದೆ.

‘ಸಿಪಿಇಸಿ ಒಂದು ಆರ್ಥಿಕ ಸಹಕಾರ ಕಾರ್ಯಕ್ರಮ ಎಂಬುದನ್ನು ಚೀನಾ ಹಲವು ಬಾರಿ ಸ್ಪಷ್ಟಪಡಿಸಿದೆ. ಇದು ಆರ್ಥಿಕ ಬೆಳವಣಿಗೆ ಹಾಗೂ ಜನರ ಜೀವನಮಟ್ಟ ಹೆಚ್ಚಿಸುವ ಸಹಕಾರಿ ತತ್ವದ ಚೌಕಟ್ಟನ್ನು ಹೊಂದಿದೆ. ಕಾಶ್ಮೀರ ವಿಷಯದ ಬಗ್ಗೆ ಚೀನಾ ಹೊಂದಿರುವ ನಿಲುವಿನ ಮೇಲೆ ಸಿಪಿಇಸಿ ಯಾವುದೇ ಪರಿಣಾಮ ಬೀರುವುದಿಲ್ಲ’ ಎಂದು ವಿದೇಶಾಂಗ ಇಲಾಖೆ ವಕ್ತಾರ ಹು ಚುಂಗ್‌ಯಿಂಗ್ ಹೇಳಿದ್ದಾರೆ.