ಪಾಕ್ ನೆಲದಲ್ಲಿ ದಾಳಿಗೆ ಸಂಚು ರೂಪಿಸಿದ್ದ ಲಾಡೆನ್

ಇಸ್ಲಾಮಾಬಾದ್ (ಪಿಟಿಐ):  ಪಾಕಿಸ್ತಾನ ನೆಲದಲ್ಲಿ ಮನಸೋ ಇಚ್ಛೆ ದಾಳಿ ಮಾಡುವ ಸಂಚನ್ನು ಅಲ್ ಖೈದಾ ಮುಖ್ಯಸ್ಥ ಒಸಾಮ ಬಿನ್ ಲಾಡೆನ್ ಹತ್ಯೆಗೆ ಮುನ್ನ ರೂಪಿಸಿದ್ದ ಎಂಬ ವಿಷಯ ಬಹಿರಂಗವಾಗಿದೆ.
ಅಬೊಟಾಬಾದ್‌ನಲ್ಲಿ ಅಮೆರಿಕ ಸೈನಿಕರಿಂದ ಹತ್ಯೆಯಾದ ನಂತರ ಆತನ ಮನೆಯಲ್ಲಿ ವಶಪಡಿಸಿಕೊಂಡ ದಾಖಲೆಗಳಿಂದ ಈ ವಿಷಯ ಬೆಳಕಿಗೆ ಬಂದಿದೆ.

ಲಾಡೆನ್ ಹತ್ಯೆ ನಂತರ ವಶಪಡಿಸಿಕೊಂಡಿರುವ ದಾಖಲೆಯಲ್ಲಿರುವ ಅಂಶಗಳನ್ನು ದ್ವಿಪಕ್ಷೀಯ ಒಪ್ಪಂದ ಅನ್ವಯ ಸಿಐಎ ಪಾಕಿಸ್ತಾನದ ಜತೆ ಹಂಚಿ ಕೊಂಡಿದ್ದು, ಬಹುಶಃ ಇಲ್ಲಿನ ಭೂ ಪ್ರದೇಶದಲ್ಲಿ ಅಲ್ ಖೈದಾ ದಾಳಿ ನಡೆಸುವ ಸಂಚು ರೂಪಿಸಿದ್ದ ಎಂದು `ಡಾನ್~ ಪತ್ರಿಕೆ ವರದಿ ಮಾಡಿದೆ.

ಇದೇ ಮೊದಲ ಬಾರಿಗೆ ಪಾಕಿಸ್ತಾನದ ಜತೆ ಅಮೆರಿಕದ ಸಿಐಎ ಮಾಹಿತಿಗಳನ್ನು ಹಂಚಿಕೊಂಡಿದೆ ಎಂದು `ಡಾನ್~ ಪತ್ರಿಕೆ ತಿಳಿಸಿದೆ.

ಅಮೆರಿಕ ಎಚ್ಚರಿಕೆ: ಮೇ 2ಕ್ಕೆ ಲಾಡೆನ್‌ನನ್ನು ಅಬೋಟಾಬಾದ್‌ನಲ್ಲಿ ಅಮೆರಿಕ ಯೋಧರು ಹತ್ಯೆ ಮಾಡಿ ಒಂದು ವರ್ಷವಾಗಲಿದ್ದು ಪಾಕಿಸ್ತಾನದಲ್ಲಿರುವ ತಮ್ಮ ದೇಶದ ರಾಜ ತಾಂತ್ರಿಕರು ಮತ್ತು ಪ್ರಜೆಗಳು ಎಚ್ಚರಿಕೆಯಿಂದ ಇರುವಂತೆ ಅಮೆರಿಕ ಸಂದೇಶ ರವಾನಿಸಿದೆ.

ಲಾಡೆನ್ ಕುಟುಂಬ ಗಡೀಪಾರು: ಪಾಕಿಸ್ತಾನವು ಲಾಡೆನ್‌ನ ಮೂವರು ವಿಧವಾ ಪತ್ನಿಯರು ಮತ್ತು ಮಕ್ಕಳು ಸೇರಿದಂತೆ ಆತನ ಕುಟುಂಬದ 14 ಸದಸ್ಯರನ್ನು ಶುಕ್ರವಾರ ಸೌದಿ ಅರೆಬಿಯಾಗೆ ಗಡೀಪಾರು ಮಾಡಿದೆ.
ಮೇ 2ಕ್ಕೆ  ಅಮೆರಿಕದ ಪಡೆಗಳಿಂದ ಲಾಡೆನ್ ಹತ್ಯೆಯಾಗಿ ಒಂದು ವರ್ಷ ಪೂರೈಸುವುದರಿಂದ ಪಾಕಿಸ್ತಾನ ಈ ಕ್ರಮ ಕೈಗೊಂಡಿದೆ ಎನ್ನಲಾಗಿದೆ.

ಬಿಗಿ ಭದ್ರತೆಯ ನಡುವೆ ಶುಕ್ರವಾರ ನಸುಕಿನಲ್ಲಿ ಛಕ್‌ಲಾಲ ಸೇನಾ ವಾಯು ನೆಲೆಯಿಂದ ಸೌದಿ ವಿಮಾನದಲ್ಲಿ ಅವರನ್ನು ಕರೆದೊಯ್ಯಲಾಯಿತು. ಇಸ್ಲಾಮಾಬಾದ್‌ನ ನಿವಾಸದಿಂದ ಅವರನ್ನು ಮಿನಿ ಬಸ್‌ನಲ್ಲಿ ವಿಮಾನ ನಿಲ್ದಾಣಕ್ಕೆ ಕರೆದೊಯ್ಯಲಾಯಿತು ಎಂದು ಮಾಧ್ಯಮಗಳು ವರದಿ ಮಾಡಿವೆ.