ಬ್ರಿಟನ್‌ ಚುನಾವಣೆ: ಮೊದಲ ಸಿಖ್‌ ಸಂಸದೆಯಾಗಿ ಆಯ್ಕೆಯಾದ ಪ್ರೀತ್‌ಕೌರ್‌ ಗಿಲ್‌
ಲಂಡನ್‌: 2017ರ ಬ್ರಿಟನ್‌ ಚುನಾವಣೆಯಲ್ಲಿ ಗೆಲುವು ಸಾಧಿಸುವ ಮೂಲಕ ಪ್ರೀತ್‌ಕೌರ್‌ ಗಿಲ್‌ ಅವರು ಬ್ರಿಟನ್‌ ಸಂಸತ್‌ಗೆ ಆಯ್ಕೆಯಾದ ಮೊದಲ ಸಿಖ್‌ ಮಹಿಳೆ ಎಂಬ ಹೆಗ್ಗಳಿಕೆ ಗಳಿಸಿದ್ದಾರೆ.
ಸದ್ಯ ಸ್ಯಾಂಡ್‌ವಿಲ್ಲೆಯ ಕೌನ್ಸಿಲರ್‌ ಆಗಿ ಸಾರ್ವಜನಿಕ ಆರೋಗ್ಯ ಹಾಗೂ ರಕ್ಷಣೆ ಖಾತೆಯನ್ನು ನಿರ್ವಹಿಸುತ್ತಿರುವ ಅವರು ಎಡ್ಜ್‌ಬಾಸ್ಟನ್‌ನಲ್ಲಿ ಸಂಸದರಾಗಿದ್ದ ಗಿಸೆಲಾ ಸ್ಟುವರ್ಟ್‌ರ ಬದಲು ಲೇಬರ್‌ ಪಕ್ಷದಿಂದ ಸ್ಪರ್ಧಿಸಿದ್ದರು.
ಆಡಳಿತಾರೂಢ ಕನ್ಸರ್ವೇಟಿವ್‌ ಪಕ್ಷದ ಕ್ಯಾರೋಲಿನ್ ಸ್ಕ್ವೈರ್ ಅವರನ್ನು 6,917 ಮತಗಳ ಅಂತರದಿಂದ ಮಣಿಸಿದ್ದಾರೆ. ಸಿಖ್‌ ಒಕ್ಕೂಟಗಳು ಚುನಾವಣಾ ಪ್ರಚಾರ ವೇಳೆ ಗಿಲ್‌ ಪರ ಪ್ರಚಾರ ಮಾಡಿದ್ದವು. ಹಾಗಾಗಿ ಗಿಲ್‌ ಅವರು ಸಿಖ್‌ ಸಮುದಾಯದ ಅಭಿವೃದ್ಧಿಗಾಗಿ ಕೆಲಸ ಮಾಡುವ ನಿರೀಕ್ಷೆಯಿದೆ.
‘ಎಡ್ಜ್‌ಬಾಸ್ಟನ್‌ ಸಂಸದೆಯಾಗಿ ಆಯ್ಕೆಯಾಗಿರುವುದು ಸಂತಸ ತಂದಿದೆ. ಯಾವಾಗಲು ಇಲ್ಲಿನ ಜನರ ಜತೆಯಿರಲು ಬಯಸುತ್ತೇನೆ. ಜನರಿಗಾಗಿ ಕೆಲಸಮಾಡುವ ಆಶಯ ಹೊಂದಿದ್ದು ಎಲ್ಲರೂ ಒಟ್ಟಾಗಿ ಮಹತ್ತರವಾದ ಕೆಲಸಗಳನ್ನು ಮಾಡೋಣ’ ಎಂದು ಗಿಲ್‌ ಕರೆ ನೀಡಿದ್ದಾರೆ.
2012ರಲ್ಲಿ ಲೇಬರ್‌ ಪಕ್ಷದಿಂದ ಸ್ಪರ್ಧಿಸಿ ಸ್ಯಾಂಡ್‌ವೇಲ್ಸ್‌ನಿಂದ ಕೌನ್ಸಿಲರ್‌ ಆಗಿ ಗಿಲ್‌ ಆಯ್ಕೆಯಾಗಿದ್ದರು. ಒಟ್ಟು 72 ಕೌನ್ಸಿಲರ್‌ಗಳ ಪೈಕಿ ಇದ್ದ ಏಕೈಕ ಸಿಖ್‌ ಮಹಿಳೆ ಎಂಬ ಶ್ರೇಯಕ್ಕೂ ಪಾತ್ರವಾಗಿದ್ದರು.
ಬ್ರಿಟನ್‌ನಲ್ಲಿ ಜೂನ್ 8ರಂದು ಚುನಾವಣೆ ನಡೆದಿತ್ತು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.