ಮುನ್ನಿ ಬದ್‌ನಾಮ್.... ಗಿನ್ನಿಸ್ ದಾಖಲೆ

ಮೆಲ್ಬರ್ನ್ (ಪಿಟಿಐ): ಪಡ್ಡೆ ಹುಡುಗರನ್ನು ಹುಚ್ಚೆದ್ದು ಕುಣಿಸಿದ್ದ ಬಾಲಿವುಡ್ ನಟ ಸಲ್ಮಾನ್ ಖಾನ್ ನಟಿಸಿರುವ ಸೂಪರ್ ಹಿಟ್ ಚಿತ್ರ ‘ದಬಾಂಗ್’ನ ‘ಮುನ್ನಿ ಬದ್‌ನಾಮ್ ಹುಯಿ... ಡಾರ್ಲಿಂಗ್ ತೇರೆ ಲಿಯೇ..’ ಹಾಡು ಗಿನ್ನಿಸ್ ದಾಖಲೆ ಪುಸ್ತಕದಲ್ಲಿ ದಾಖಲಾಗುವ ಮೂಲಕ ಇತಿಹಾಸ ಸೃಷ್ಟಿಸಿದೆ.

‘ಇಂಡಿಯನ್ ಫಿಲ್ಮ್  ಫೆಸ್ಟಿವಲ್ -2011’ರ ನಿರ್ದೇಶಕ ಮಿತು ಭೋವ್‌ಮಿಕ್ ಲಾಂಜ್ ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ಮಲೈಕಾ ನೇತೃತ್ವದಲ್ಲಿ 1200 ಜನರು ಮೂರು ನಿಮಿಷಗಳ ಕಾಲ ಈ ಹಾಡಿಗೆ ನೃತ್ಯ ಮಾಡುವ ಮೂಲಕ ಗಿನ್ನಿಸ್ ದಾಖಲೆ ನಿರ್ಮಿಸಿದರು. ಕಳೆದ ವಾರಾಂತ್ಯದಲ್ಲಿ ಮೆಲ್ಬರ್ನ್ ಉದ್ಯಾನವನದಲ್ಲಿ ಈ ನೃತ್ಯ ಕಾರ್ಯಕ್ರಮವನ್ನು ಹಮ್ಮಿಕೊಳ್ಳಲಾಗಿತ್ತು. ಹೊಸ ದಾಖಲೆ ನಿರ್ಮಿಸಿದ್ದಕ್ಕಾಗಿ ಮಲೈಕಾ ಭಾನುವಾರ ಪ್ರಮಾಣ ಪತ್ರ ಪಡೆದರು.