ಯುವಕನ ಪ್ರಾಣಕ್ಕೆ ಎರವಾದ ಮೊಬೈಲ್ ಸಂದೇಶ

ನ್ಯೂಯಾರ್ಕ್ (ಎಎಫ್‌ಪಿ): ಕಳೆದ ವಾರ ಮೊಬೈಲ್ ಸಂದೇಶ ಬರೆಯುವಾಗ ಮೈಮರೆತು ಅಪಘಾತಕ್ಕೆ ಒಳಗಾಗಿ ಮೃತಪಟ್ಟ ಅಮೆರಿಕದ ಯುವಕನ ಪಾಲಕರು ಆತ ಬರೆದಿದ್ದ ಸಂದೇಶವನ್ನು ಬಹಿರಂಗ ಪಡಿಸಿದ್ದಾರೆ.

ವಾಹನ ಚಾಲನೆ ಮಾಡುವಾಗ ಟೆಕ್ಸ್ಟ್ ಸಂದೇಶ ಕಳುಹಿಸುವುದು ಸರಿಯಲ್ಲ. ಇದು ಪ್ರಾಣಕ್ಕೆ ಎರವಾಗುತ್ತದೆ. ಯುವ ಜನರಿಗೆ ಕಿವಿಮಾತು ಹೇಳುವ ಉದ್ದೇಶದಿಂದಲೇ ಈ ಸಂದೇಶ ಬಿಡುಗಡೆ ಮಾಡಿದ್ದಾಗಿ ಆ ಯುವಕನ ತಾಯಿ ಶರೋನ್ ಹೇಟ್ ತಿಳಿಸಿದ್ದಾರೆ.

`ಹೀಗೆ ಮಾಡುವುದರಿಂದ ನೀವು ಕ್ಷಣಾರ್ಧದಲ್ಲಿ ನಿಮ್ಮ ಭವಿಷ್ಯ ಹಾಳು ಮಾಡಿಕೊಳ್ಳಬಹುದು. ಬೇರೆಯವರಿಗೆ ಗಾಯ ಮಾಡಬಹುದು ಅಥವಾ ಅವರನ್ನು ಸಾಯಿಸಬಹುದು. ನಿಮ್ಮನ್ನು ಪ್ರೀತಿಸುವ ಎಲ್ಲರ ಹೃದಯಕ್ಕೆ ನೋವು ನೀಡಬಹುದು' ಎಂದು ಅವರು ಹೇಳಿಕೆಯಲ್ಲಿ ತಿಳಿಸಿದ್ದಾರೆ.

ಉತ್ತರ ಕೊಲರಡೊ ವಿಶ್ವವಿದ್ಯಾಲಯದ ವಿದ್ಯಾರ್ಥಿಯಾಗಿದ್ದ ಅಲೆಕ್ಸಾಂಡರ್ ಹೇಟ್, ತನ್ನ ಸ್ನೇಹಿತನಿಗೆ ಮೊಬೈಲ್ ಸಂದೇಶ ಕಳುಹಿಸುವ ಭರದಲ್ಲಿ ನಿರ್ಲಕ್ಷ್ಯದಿಂದ ಕಾರು ಚಾಲನೆ ಮಾಡಿ ಅಪಘಾತಕ್ಕೆ ಒಳಗಾಗಿದ್ದ. ಅಲ್ಲದೇ ಅಪಘಾತದಲ್ಲಿ ಮೃತಪಟ್ಟಿದ್ದ.