ಲಿಬಿಯಾ: ಯುದ್ಧ ಅಪರಾಧ ಎತ್ತಿಹಿಡಿದ ವಿಶ್ವಸಂಸ್ಥೆ

ವಿಶ್ವಸಂಸ್ಥೆ (ಪಿಟಿಐ): ಲಿಬಿಯಾದಲ್ಲಿ ನಡೆಯುತ್ತಿರುವ ದಂಗೆಯ ಬಗ್ಗೆ ತನಿಖೆ ನಡೆಸುತ್ತಿರುವ ವಿಶ್ವಸಂಸ್ಥೆಯ ಸಮಿತಿಯು, ಅಧ್ಯಕ್ಷ ಮುಅಮ್ಮರ್ ಗಡಾಫಿ ಹಾಗೂ ಅವರ ವಿರುದ್ಧ ಹೋರಾಡುತ್ತಿರುವ ಬಂಡುಕೋರರು ಇಬ್ಬರೂ ಯುದ್ಧ ಅಪರಾಧಗಳನ್ನು ಎಸಗಿದ್ದಾರೆ ಎಂದು ಅಭಿಪ್ರಾಯಪಟ್ಟಿದೆ.

ಕಳೆದ 15 ವಾರಗಳಿಂದ ನಡೆಯುತ್ತಿರುವ ಉಭಯತ್ರರ ನಡುವಿನ ಕಾಳಗದಲ್ಲಿ ಸಾಕಷ್ಟು ಯುದ್ಧ ಮತ್ತು ಮಾನವತಾ ವಿರೋಧಿ ಅಪರಾಧಗಳನ್ನು ಎಸಗಲಾಗಿದೆ. ಎರಡೂ ಕಡೆಯವರು ಇಂತಹ ಕೃತ್ಯಗಳಲ್ಲಿ ಭಾಗಿಯಾಗಿದ್ದಾರೆ ಎಂದು ಹೇಳಿದೆ. ಸರ್ಕಾರಿ ಪಡೆಗಳಂತೂ ನಾಗರಿಕರ ವಿರುದ್ಧ ಹತ್ಯೆ, ಬಂಧನ, ದೌರ್ಜನ್ಯ, ಲೈಂಗಿಕ ದೌರ್ಜನ್ಯದಂತಹ ವ್ಯವಸ್ಥಿತ ದಾಳಿ ನಡೆಸಿ ಅಂತರ ರಾಷ್ಟ್ರೀಯ ಕಾನೂನನ್ನು ಉಲ್ಲಂಘಿಸಿವೆ. ಈವರೆಗೆ ಸುಮಾರು 10ರಿಂದ 15 ಸಾವಿರ ಜನ ಇಂತಹ ಕೃತ್ಯಗಳಿಗೆ ಬಲಿಯಾಗಿದ್ದಾರೆ ಎಂದು ತಿಳಿಸಿದೆ.