ಚಂಡಮಾರುತ ಭೀತಿ, ಫ್ಲಾರಿಡಾದಲ್ಲಿ ತುರ್ತು ಪರಿಸ್ಥಿತಿ ಘೋಷಣೆ

ಟಲ್ಲಹಸ್ಸೆ (ಅಮೆರಿಕ): ಕೆರಿಬಿಯನ್ ಸಮುದ್ರದಲ್ಲಿ ಕಾಣಿಸಿಕೊಂಡಿರುವ ಚಂಡಮಾರುತ ಫ್ಲಾರಿಡಾ ರಾಜ್ಯದತ್ತ ಸಾಗುತ್ತಿದ್ದು, ತೀವ್ರ ಹಾನಿ ಉಂಟುಮಾಡುವ ಸಾಧ್ಯತೆ ಇರುವುದರಿಂದ ಫ್ಲಾರಿಡಾ ರಾಜ್ಯದಾದ್ಯಂತ ತುರ್ತು ಪರಿಸ್ಥಿತಿ ಘೋಷಿಸಲಾಗಿದೆ.

‘ಇಯಾನ್‌ ಚಂಡಮಾರುತ ಇಡೀ ರಾಜ್ಯವನ್ನು ವ್ಯಾಪಿಸುವ ಸಾಧ್ಯತೆ ಇದೆ. ಗಂಟೆಗೆ 85 ಕಿ.ಮೀ.ವೇಗದಲ್ಲಿ ಬಿರುಗಾಳಿ ಬೀಸಬಹುದು. ಯಾವುದೇ ಅನಾಹುತ ಎದುರಿಸಲು ಜನ ಸನ್ನದ್ಧರಾಗಿರಬೇಕು’ ಎಂದು ಫ್ಲಾರಿಡಾದ ಗವರ್ನರ್‌ ರಾನ್‌ ಡೆಸಾಂಟಿಸ್‌ ತಿಳಿಸಿದ್ದಾರೆ.

ಚಂಡಮಾರುತ ಅಪಾಯದ ಹಿನ್ನೆಲೆಯಲ್ಲಿ ಅಧ್ಯಕ್ಷ ಜೋ ಬೈಡನ್‌ ಅವರು ಇದೇ 27ರ ಉದ್ದೇಶಿತ ಫ್ಲಾರಿಡಾ ಭೇಟಿಯನ್ನು ಮುಂದೂಡಲಾಗಿದೆ.