ಅಮೆರಿಕದಲ್ಲಿನ ಭಾರತೀಯ ದಲಿತ ಹೋರಾಟಗಾರ ಮಿಲಿಂದ್ ಮಕ್ವಾನಾ ನಿಧನ

ವಾಷಿಂಗ್ಟನ್: ದಲಿತರ, ಶೋಷಿತರ ಪರವಾಗಿ ಹೋರಾಟ ಮಾಡುವುದರಲ್ಲಿ ಅಮೆರಿಕದಲ್ಲಿ ಮುಂಚೂಣಿಯಲ್ಲಿದ್ದ ಮಿಲಿಂದ್ ಮಕ್ವಾನಾ (54) ಎನ್ನುವರು ಭಾನುವಾರ ಮೃತಪಟ್ಟಿದ್ದಾರೆ.

ಮಿಲಿಂದ್ ಅವರ ಪತ್ನಿ ಹೇಳಿಕೆ ಉಲ್ಲೇಖಿಸಿ ಪಿಟಿಐ ಈ ವರದಿ ಮಾಡಿದೆ.

ಕ್ಯಾಲಿಫೋರ್ನಿಯಾ ಸ್ಟೇಟ್ ಅಸೆಂಬ್ಲಿಯು ಇತ್ತೀಚೆಗೆ ಜಾತಿ ತಾರತಮ್ಯ ವಿರೋಧಿ ಮಸೂದೆಯನ್ನು (SB403) ತರಲು ಹೊರಟಿದೆ. ‘ಇದು ಅಮೆರಿಕದಲ್ಲಿ ಭಾರತೀಯ ಹಿಂದೂಗಳ ನಡುವೆ ಹಾಗೂ ಭಾರತೀಯ ದಲಿತರ ನಡುವೆ ತಾರತಮ್ಯ ಮಾಡುತ್ತದೆ’ ಎಂದು ಮಿಲಿಂದ್ ಅವರು SB403 ವಿರುದ್ಧ ತೀವ್ರ ಧ್ವನಿ ಎತ್ತಿದ್ದರು.

ಇತ್ತೀಚೆಗೆ ಮಿಲಿಂದ್ ಅವರು ಸಿಟಿ ಕೌನ್ಸಿಲ್ ಸಭೆಯಲ್ಲಿ ಈ ವಿಚಾರವಾಗಿ ಸುಧೀರ್ಘ ಭಾಷಣ ಮಾಡಿದ್ದರು. ಭಾನುವಾರ ಮನೆಯಲ್ಲಿ ಏಕಾಏಕಿ ಕುಸಿದು ಬಿದ್ದಿದ್ದರು. ಹೃದಯ ಸ್ತಂಭನದಿಂದ ಅವರ ಸಾವಾಗಿದೆ ಎಂದು ವೈದ್ಯರು ತಿಳಿಸಿದ್ದಾರೆ.

ಮಿಲಿಂದ್ ಅವರು Sewa International USA ನಲ್ಲಿ ಸಕ್ರಿಯ ಸ್ವಯಂಸೇವಕರಾಗಿದ್ದರು. ಅಲ್ಲದೇ ಅಮೆರಿಕದಲ್ಲಿ ಭಾರತೀಯ ದಲಿತರ ಹಾಗೂ ಶೋಷಿತರ ಬಗ್ಗೆ ಹೋರಾಟಗಳಲ್ಲಿ, ಸಮಾವೇಶಗಳಲ್ಲಿ, ಸೆಮಿನಾರ್‌ಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಳ್ಳುತ್ತಿದ್ದರು.

ಮಿಲಿಂದ್ ಮಕ್ವಾನಾ Ambedkar-Phule Network of American Dalits and Bahujans (APNADB) ಸದಸ್ಯರೂ ಆಗಿದ್ದರು.