ಶನಿವಾರ 14–5–1994

ಬಹುಪಕ್ಷೀಯ ಸಭೆಗೆ ಭಾರತ ಅಸಮ್ಮತಿ

ನವದೆಹಲಿ, ಮೇ 13 (ಪಿಟಿಐ)– ದಕ್ಷಿಣ ಏಷ್ಯದಲ್ಲಿ ಅಣ್ವಸ್ತ್ರ ಪ್ರಸರಣ ನಿಷೇಧಕ್ಕೆ ಸಂಬಂಧಿಸಿದಂತೆ ಬಹುಪಕ್ಷೀಯ ಸಭೆ ನಡೆಸುವ ಅಮೆರಿಕದ ಉದ್ದೇಶವನ್ನು ಭಾರತ ಒಪ್ಪದು ಎಂದು ಪ್ರಧಾನಿ ಪಿ.ವಿ. ನರಸಿಂಹರಾವ್ ಅವರ ಭೇಟಿಯ ವೇಳೆ ಅಮೆರಿಕಕ್ಕೆ ತಿಳಿಸಲಾಗುವುದು.

ದೂರವಾಣಿ – ಖಾಸಗಿಗೆ ಅವಕಾಶ

ನವದೆಹಲಿ, ಮೇ 13 (ಯುಎನ್‌ಐ, ಪಿಟಿಐ)– ಜನರಿಗೆ ಮೂಲಭೂತ ದೂರವಾಣಿ ಸೌಲಭ್ಯ ಒದಗಿಸುವ ಕಾರ್ಯದಲ್ಲಿ ಖಾಸಗಿ ವಲಯಕ್ಕೂ ಅವಕಾಶ ನೀಡಲು ಸರ್ಕಾರ ಇಂದು ನಿರ್ಧರಿಸಿತು. ಈ ಮೂಲಕ ದೂರಸಂಪರ್ಕ ವ್ಯವಸ್ಥೆಯ ಮೇಲಿನ ಸರ್ಕಾರದ ಏಕಸ್ವಾಮ್ಯ ಕೊನೆಗೊಳ್ಳಲಿದೆ. ಸಂಪರ್ಕ ಖಾತೆಯ ರಾಜ್ಯ ಸಚಿವ ಸುಖರಾಮ್ ಈ ನೀತಿಯನ್ನು ಲೋಕಸಭೆಯಲ್ಲಿ ಮಂಡಿಸಿದರು.

ಎಲ್ಲ ಪಟ್ಟಣ ಪ್ರದೇಶಗಳಲ್ಲಿ 1997ರ ವೇಳೆಗೆ ಕೇಳಿದವರಿಗೆಲ್ಲ ದೂರವಾಣಿ ಸಂಪರ್ಕ ನೀಡಲು ಈ ನಿರ್ಧಾರದಿಂದ ಸಾಧ್ಯವಾಗುವುದು ಎಂದು ಸರ್ಕಾರ ಆಶಿಸಿದೆ. ಜತೆಗೆ ಎಲ್ಲ ಗ್ರಾಮೀಣ ಪ್ರದೇಶಗಳಿಗೆ ದೂರವಾಣಿ ಸೌಲಭ್ಯ ಒದಗಿಸಲು ಮತ್ತು ಪ್ರತಿ 500 ಜನರಿಗೆ ಒಂದು ಸಾರ್ವಜನಿಕ ದೂರವಾಣಿ ಬೂತ್ ದೊರಕಿಸಿಕೊಡಲು ಸರ್ಕಾರ ಉದ್ದೇಶಿಸಿದೆ.