ರಾಜಕೀಯ ಮತ್ತು ಸನ್ಯಾಸಿಗಳು

ಕೆಲವು ಬಾಬಾಗಳು, -ಸ್ವಾಮಿಗಳು ಕಾವಿ ಹೊದ್ದು ಸರ್ವಸಂಗ ಪರಿತ್ಯಾಗಿಗಳೆಂದು ಹೇಳಿಕೊಂಡರೂ ಅವರಿಗೆ ರಾಜಕೀಯ ಸಖ್ಯ ಇರುವುದನ್ನು ಬಹಿರಂಗವಾಗಿ ಅವರೇ ತೋರಿಸಿಕೊಳ್ಳುತ್ತಾರೆ.

ಅವರಲ್ಲಿ ಪ್ರಮುಖರು  ಬಾಬಾ ರಾಮದೇವ್. ಅವರೊಂದಿಗೆ ಇನ್ನೂ ಹಲವರು ಸ್ವಾಮಿಗಳು ಇದ್ದಾರೆ.  ಧರ್ಮ  ಅಥವಾ ಭಾರತೀಯ ಸಂಸ್ಕೃತಿಯ ಹೆಸರಲ್ಲಿ ನಡೆಸುವ ಮಹೋತ್ಸವ, ರಾಷ್ಟ್ರೀಯತೆ ಜಾಗೃತಿಯ ನೆಪದಲ್ಲಿ ನಡೆಸುವ ಬೃಹತ್ ಸಭೆ ಸಮಾರಂಭಗಳ ಮೇಲೆಯೂ ಚುನಾವಣಾ ಆಯೋಗ ಕಣ್ಣು ಇಡಬೇಕಾದುದು ಅತೀ ಅಗತ್ಯ. 

ರಾಮದೇವ್  ಅಂತೂ ತಮ್ಮ ಪ್ರತೀ ಸಭೆ­ಯಲ್ಲೂ  ಕಾಂಗ್ರೆಸ್ಸನ್ನು ನೇರವಾಗಿ ಹಳಿಯುವುದು ಮತ್ತು ಬಿಜೆಪಿ ಯನ್ನು ಹೊಗಳುವುದನ್ನು ಮರೆಯು­ವುದಿಲ್ಲ.  ರಾಮದೇವ್ ಅವರ  ‘ಭಾರತ್ ಸ್ವಾಭಿಮಾನ್ ಟ್ರಸ್ಟ್’ನ ಪತ್ರಿಕಾ ಪ್ರಕಟಣೆಯಲ್ಲಿ ಅವರೇ ಹೇಳಿಕೊಂಡಿರುವಂತೆ  ಈ ತಿಂಗಳ  17 ರಿಂದ  23ರ ವರೆಗೆ  ‘ಯೋಗ - ಸಪ್ತಾಹ ’ ನಡೆಸಿ ಅದರಲ್ಲಿ  ಹತ್ತು  ಕೋಟಿ ಜನರು ಭಾಗವಹಿಸಿ ನೂತನ ಚರಿತ್ರೆ ನಿರ್ಮಾಣ ಮಾಡಲಿದ್ದಾರಂತೆ.

ಅವರ ಪತಂಜಲಿ ಯೋಗ ಟ್ರಸ್ಟ್  ಸಹಾ ಇದರಲ್ಲಿ ಪಾಲು­ಗೊಳ್ಳಲಿದೆ. ಭಾರತ್ ಸ್ವಾಭಿ­ಮಾನ್ ಟ್ರಸ್ಟ್ ಮತ್ತೂ ಪತಂಜಲಿ ಟ್ರಸ್ಟ್ ಇವೆರಡೂ ಬಿಜೆಪಿ­ ಪರ  ಸಹಾನೂಭೂತಿ ಹೊಂದಿರುವಂತಹವೇ !  ಹಾಗಿರುವಾಗ  ಲೋಕಸಭೆ  ಚುನಾವಣೆ  ವೇಳೆ ಇವರ ಬೃಹತ್ ಯೋಗ ಮತ್ತೂ ರಾಷ್ಟ್ರೀಯತೆ ಜಾಗೃತಿ ಸಪ್ತಾಹ­ಗಳನ್ನು  ಇಡೀ ದೇಶದಲ್ಲಿ ಆಯೋಜಿಸಿರುವುದು ಬಿಜೆಪಿಯ  ಪರೋಕ್ಷ ಪ್ರಚಾರಕ್ಕೆ ಇರಬಹುದೇ?  ಸಂಶಯ  ಮೂಡುತ್ತಿದೆ.