2013 : ಚಲುವಿ ಬಾರೆ !

ಹೊಸವರ್ಷದಾ ಚಲುವಿ ಚಲ್ವ ಸುಂದರಿ ಬಾರೆ
ಕನಸುಗಳ ಗಿಟಗೊಬ್ರಿ ಬೆಲ್ಲ ತಾರೆ
ಪ್ರಳಯ ಭೀತಿಯ ಹಾಕಿ ಹಳೆಯ ವರ್ಷವು ಹೋತು

ಹೊಸವೀರ ಸಂಕಲ್ಪ ತುಂಬಿ ಬಾರೆ
ಕೆಟ್ಟ ಕನಸನು ಕೊಟ್ಟು ಕನ್ನೆಯರ ಎದೆ ಸುಟ್ಟು
ಕಾಡಿ ಹೋಗಿಹ ವರ್ಷ ಸಾಕುಸಾಕು

ಥೈಥೈಯ್ಯ ಹೊಸವರ್ಷ ನವಗಾನ ಸಂಘರ್ಷ
ಹೊಸ ಶಕ್ತಿ ಹೊಸ ಯುಕ್ತಿ ಸತ್ಯ ಬೇಕು
ಹರೆಯ ಹೆಣ್ಣಿಗೆ ಶರಣು ಮಕ್ಕಳಿಗೆ ಶುಭಶರಣು

ಅನ್ನವಿಲ್ಲದ ಜನಕೆ ಕೋಟಿ ಶರಣು
ಸೋತ ಜನಗಳ ಕೂಗು ಕೇಳ್ವ ಜನರಿಗೆ ಶರಣು
ಹೊಸವರ್ಷದಾ ಹರ್ಷ ಚಲುವಿ ಶರಣು