ಇಷ್ಟೊಂದು ಹೆಚ್ಚಳ ಅನಿವಾರ್ಯವೇ?

ಕರ್ನಾಟಕ ಹಾಲು ಮಹಾಮಂಡಳವು ಹಾಲಿನ ಬೆಲೆಯನ್ನು ಇತ್ತೀಚೆಗೆ ಪರಿಷ್ಕರಿಸಿದೆ. ತರಾವರಿ ಮಾದರಿಯ ಹಾಲು ಹಾಗೂ ಮೊಸರು ಸೇರಿದಂತೆ ಒಂದು ಲೀಟರಿಗೆ ಎರಡು ರೂಪಾಯಿಯನ್ನು ಏರಿಸಲಾಗಿದೆ. ಇದನ್ನೇ ಆಧಾರವಾಗಿ ಇಟ್ಟುಕೊಂಡು ಹೋಟೆಲುಗಳು ಸಹ ಕಾಫಿ, ಚಹಾ ಅಷ್ಟೇ ಅಲ್ಲದೆ ತಿನಿಸುಗಳ ದರಗಳನ್ನೂ ಏರಿಸಿವೆ.

ಕಾಫಿ ಮತ್ತು ಚಹಾದ ಬೆಲೆಯನ್ನು ಒಂದು ಕಪ್ಪಿಗೆ ಎರಡು ರೂಪಾಯಿಯಷ್ಟು ಏರಿಸಲಾಗಿದೆ. ಒಂದು ಲೀಟರ್ ಹಾಲಿಗೆ ಎರಡು ರೂಪಾಯಿ ಏರಿಕೆಯಾದರೆ, ಒಂದು ಕಾಫಿಗೂ ಎರಡು ರೂಪಾಯಿ ಏರಿಸುವುದು ಸಮಂಜಸವೇ? ಒಂದು ಕಾಫಿಗೆ ಒಂದು ಲೀಟರ್ ಹಾಲು ಬಳಸುತ್ತಾರೆಯೇ? ಹಾಲಿನ ಬೆಲೆ ಏರಿಕೆಯಾದರೆ ತಿನಿಸುಗಳ ಬೆಲೆಯನ್ನೂ ಏರಿಸಬೇಕೇಕೆ? ಹೋಟೆಲುಗಳವರು ಕಾಫಿಗೆ ಕಡಿಮೆ ದರ ನಿಗದಿಪಡಿಸಲಿ. ಉತ್ಸಾಹ ತುಂಬುವ ಪಾನೀಯವು ಬಡವರ ಕೈಗೆಟುಕುವಂತೆ ಇರಲಿ. ಪ್ರಮಾಣ ಸ್ವಲ್ಪಮಟ್ಟಿಗೆ ಕಡಿಮೆಯಾದರೂ ಚಿಂತೆಯಿಲ್ಲ. ಈ ಕುರಿತು ಹೋಟೆಲ್ ಸಂಘಗಳವರು ಒಂದು ನಿರ್ಧಾರಕ್ಕೆ ಬರಲಿ.

ಪತ್ತಂಗಿ ಎಸ್. ಮುರಳಿ,ಬೆಂಗಳೂರು