ವಿಶ್ವ ಹಾಕಿ ಸರಣಿ: ಪುಣೆ ತಂಡಕ್ಕೆ ರೋಚಕ ಜಯ

ಪುಣೆ: ಕರ್ನಾಟಕ ಲಯನ್ಸ್ ತಂಡದವರು ಇಲ್ಲಿ ನಡೆಯುತ್ತಿರುವ ವಿಶ್ವ ಹಾಕಿ ಸರಣಿಯ ಪಂದ್ಯದಲ್ಲಿ ಮತ್ತೊಂದು ಸೋಲು ಕಂಡಿದ್ದಾರೆ. ಈ ಮೂಲಕ ಪಾಯಿಂಟ್ ಪಟ್ಟಿಯಲ್ಲಿ ಕೊನೆಯ ಸ್ಥಾನಕ್ಕೆ ಕುಸಿದಿದ್ದಾರೆ.
ಸೋಮವಾರ ನಡೆದ ಪಂದ್ಯದಲ್ಲಿ ಪುಣೆ ಸ್ಟ್ರೈಕರ್ಸ್ 3-2 ಗೋಲುಗಳಿಂದ ಲಯನ್ಸ್ ತಂಡವನ್ನು ಸೋಲಿಸಿತು. 

 ವಿರಾಮದ ವೇಳೆಗೆ ಉಭಯ ತಂಡಗಳು ತಲಾ 1-1 ಗೋಲು ಗಳಿಸಿದ್ದವು. ಆದರೆ ದ್ವಿತೀಯಾರ್ಧದಲ್ಲಿ ಆತಿಥೇಯ ತಂಡ ಪಾರಮ್ಯ ಮೆರೆಯಿತು. ಈ ತಂಡದ ರೋಷನ್ ಮಿನ್ಜ್ (8ನೇ ನಿಮಿಷ), ಲುಂಗಿಲೆ ಸೊಲೆಕಿಲೆ (47ನೇ ನಿ.) ಹಾಗೂ ದಮನ್‌ದೀಪ್ ಸಿಂಗ್ (56ನೇ ನಿ.) ಗೋಲು ಗಳಿಸಿದರು. ಕರ್ನಾಟಕ ತಂಡದ ಲೆನ್ ಅಯ್ಯಪ್ಪ (24ನೇ ನಿ; ಪೆನಾಲ್ಟಿ ಕಾರ್ನರ್) ಹಾಗೂ ಇನೊಸೆಂಟ್ ಕುಲ್ಲು (48ನೇ ನಿ.) ಚೆಂಡನ್ನು ಗುರಿ ಸೇರಿಸಿದರು.

ಕರ್ನಾಟಕ ಆಡಿದ ಏಳು ಪಂದ್ಯಗಳಲ್ಲಿ ಎರಡಲ್ಲಿ ಮಾತ್ರ ಗೆಲುವು ಸಾಧಿಸಿದೆ. ಹಾಗಾಗಿ ಈ ತಂಡ ಆರು ಪಾಯಿಂಟ್‌ಗಳೊಂದಿಗೆ ಪಟ್ಟಿಯಲ್ಲಿ ಕೊನೆಯ ಸ್ಥಾನದಲ್ಲಿದೆ. ಆದರೆ ಪುಣೆ ತಂಡ         12 ಪಾಯಿಂಟ್‌ಗಳೊಂದಿಗೆ ಅಗ್ರಸ್ಥಾನದಲ್ಲಿದೆ.

ಈ ತಂಡ ಆಡಿದ ಏಳು ಪಂದ್ಯಗಳಲ್ಲಿ ಮೂರರಲ್ಲಿ ಗೆಲುವು ಹಾಗೂ ಮೂರು ಪಂದ್ಯಗಳಲ್ಲಿ ಡ್ರಾ ಸಾಧಿಸಿದೆ. ಒಂದು ಪಂದ್ಯದಲ್ಲಿ ಮಾತ್ರ ಸೋಲು ಅನುಭವಿಸಿದೆ.