ಫುಟ್‌ಬಾಲ್‌: ಸೆಮಿಫೈನಲ್‌ಗೆ ಎಂಪೈರ್‌ ಎಫ್‌ಸಿ
ಫುಟ್‌ಬಾಲ್‌
ಬೆಂಗಳೂರು: ಮೊಹಮ್ಮದ್‌ ಇಜಾಸ್‌ ಅವರ ನಿರ್ಣಾಯಕ ಗೋಲಿನಿಂದಾಗಿ ಎಂಪೈರ್‌ ಎಫ್‌ಸಿ ತಂಡವು ಬಿಡಿಎಫ್‌ಎ ‘ಸಿ’ ಡಿವಿಷನ್‌ ಫುಟ್‌ಬಾಲ್‌ ಲೀಗ್‌ನ ಕ್ವಾರ್ಟರ್‌ ಫೈನಲ್‌ ಪಂದ್ಯದಲ್ಲಿ 1–0 ಯಿಂದ ಯಂಗ್‌ ಬಾಯ್ಸ್‌ ಎಫ್‌ಸಿ ತಂಡವನ್ನು ಮಣಿಸಿತು.
ಬೆಂಗಳೂರು ಫುಟ್‌ಬಾಲ್‌ ಕ್ರೀಡಾಂಗಣದಲ್ಲಿ ಬುಧವಾರ ನಡೆದ ಪಂದ್ಯದಲ್ಲಿ ಇಜಾಸ್‌ ಅವರು 46ನೇ ನಿಮಿಷ ಗೋಲು ಗಳಿಸಿದರು.
ಮತ್ತೊಂದು ಪಂದ್ಯದಲ್ಲಿ, ಜೈ ಭಾರತ್‌ ನಗರ ಎಫ್‌ಸಿ ತಂಡವು 3–1ರಿಂದ ಯೂನಿವರ್ಸಲ್‌ ಎಫ್‌ಸಿ ತಂಡವನ್ನು ಸೋಲಿಸಿ ಸೆಮಿಫೈನಲ್‌ ಪ್ರವೇಶಿಸಿತು. ಜೈ ಭಾರತ್‌ ನಗರ ಎಫ್‌ಸಿ ತಂಡದ ಅಭಿನವ್‌ ಬಿ. (5ನೇ ನಿ.) ಒಂದು ಗೋಲು ಮತ್ತು ರೋಶನ್‌ ಪಿ.ಎ. (30+1ನೇ ಹಾಗೂ 35ನೇ ನಿ.) ಎರಡು ಗೋಲು ಹೊಡೆದರು. ಯೂನಿವರ್ಸಲ್‌ ಎಫ್‌ಸಿ ಪರ ನಂದನ್‌ ಎಂ.ಡಿ. (41ನೇ ನಿ.) ಏಕೈಕ ಗೋಲು ಗಳಿಸಿದರು.
ಇದೇ 28ರಂದು ನಡೆಯಲಿರುವ ಸೆಮಿಫೈನಲ್‌ ಪಂದ್ಯದಲ್ಲಿ, ಎಂಪೈರ್‌ ಎಫ್‌ಸಿ ಹಾಗೂ ಜೈ ಭಾರತ್‌ ನಗರ ಎಫ್‌ಸಿ ತಂಡಗಳು ಸೆಣಸಲಿವೆ.
ಗುರುವಾರ ನಡೆಯಲಿರುವ ಕ್ವಾರ್ಟರ್‌ಫೈನಲ್‌ ಪಂದ್ಯಗಳಲ್ಲಿ, ಕೊಂಕಣ್‌ ಎಫ್‌ಸಿ ತಂಡವು ಪಿಳ್ಳಣ್ಣ ಗಾರ್ಡನ್‌ ಎಫ್‌ಸಿ ತಂಡವನ್ನು ಹಾಗೂ ಇಂದಿರಾನಗರ ಎಫ್‌ಸಿ ತಂಡವು ಮಹಾರಾಜ ಸೋಷಿಯಲ್ಸ್‌ ತಂಡವನ್ನು ಎದುರಿಸಲಿವೆ.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.