ವಿಶ್ವ ಯುವ ಟೇಬಲ್‌ ಟೆನಿಸ್‌ ಚಾಂಪಿಯನ್‌ಷಿಪ್‌: ಭಾರತಕ್ಕೆ 1 ಬೆಳ್ಳಿ, 2 ಕಂಚು
ದಿವ್ಯಾಂಶಿ ಭೌಮಿಕ್
ಕ್ಲುಯ್ ನಪೊಕಾ (ರುಮೇನಿಯಾ): ಭಾರತದ ಉದಯೋನ್ಮುಖ ಆಟಗಾರ್ತಿ ದಿವ್ಯಾನ್ಶಿ ಭೌಮಿಕ್ ಅವರು ಐಟಿಟಿಎಫ್‌ ವಿಶ್ವ ಯುವ ಟೇಬಲ್‌ ಟೆನಿಸ್‌ ಚಾಂಪಿಯನ್‌ಷಿಪ್‌ನಲ್ಲಿ 15 ವರ್ಷದೊಳಗಿನವರ ವಿಭಾಗದಲ್ಲಿ ಭಾನುವಾರ ಕಂಚಿನ ಪದಕ ಗೆದ್ದುಕೊಂಡರು.
15 ವರ್ಷ ವಯಸ್ಸಿನ ದಿವ್ಯಾನ್ಶಿ, ಸೆಮಿಫೈನಲ್‌ನಲ್ಲಿ ಹೋರಾಟ ತೋರಿದರೂ 1–4 ರಲ್ಲಿ (12–10, 10–12, 6–11, 4–11, 8–11ರಲ್ಲಿ) ಚೀನಾದ ಝು ಕ್ವಿಹುಯಿ ಅವರಿಗೆ ಮಣಿದು ಕಂಚಿನ ಪದಕಕ್ಕೆ ತೃಪ್ತಿಪಟ್ಟುಕೊಳ್ಳಬೇಕಾಯಿತು.
ಇದಕ್ಕೆ ಮೊದಲು ಭಾರತದ ಆಟಗಾರ್ತಿ, ಯುರೋಪ್‌, ಕೊರಿಯಾ, ಜಪಾನ್‌ ಎದುರಾಳಿಗಳ ವಿರುದ್ಧ ಹೋರಾಡಿ ಜಯ ಸಾಧಿಸಿದ್ದರು.
ಭಾರತ ತಂಡ ವಿಭಾಗದಲ್ಲಿ ಎರಡು ಪದಕಗಳನ್ನು ಗೆದ್ದುಕೊಂಡಿತು. 15 ವರ್ಷದೊಳಗಿನ ಬಾಲಕಿಯರ ತಂಡ (ದಿವ್ಯಾನ್ಶಿ, ಅನನ್ಯಾ ಮುರಳೀಧರನ್, ಅಂಕೊಲಿಕಾ ಚಕ್ರವರ್ತಿ ಮತ್ತು ನೈಶಾ ರೆವಾಸ್ಕರ್‌) ಕಂಚಿನ ಪದಕ ಗೆದ್ದಿತ್ತು.
19 ವರ್ಷದೊಳಗಿನವರ ಬಾಲಕರ ವಿಬಾಗದಲ್ಲಿ ಭಾರತ ತಂಡ ಬೆಳ್ಳಿ ಪದಕ ಗೆದ್ದಿತು. ಅಂಕುರ್ ಭಟ್ಟಾಚಾರ್ಜಿ, ಅಭಿನಂದ್‌ ಪ್ರದಿವಾಧಿ, ಪುನಿತ್ ಬಿಸ್ವಾಸ್‌ ಮತ್ತು ಪ್ರಿಯಾನುಜ್ ಭಟ್ಟಾಚಾರ್ಯ ಅವರನ್ನು ತಂಡ ಒಳಗೊಂಡಿತ್ತು.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.