ವಿಶ್ವ ಚಾಂಪಿಯನ್‌ಷಿಪ್‌ ಕುಸ್ತಿ: ಭಾರತಕ್ಕೆ ನಿರಾಸೆ

ನೋವಿಸಾಡ್‌ (ಸರ್ಬಿಯಾ): ಭಾರತದ ಗ್ರೀಕೊ ರೋಮನ್‌ ಕುಸ್ತಿಪಟುಗಳು ಸೋಮವಾರ ಆರಂಭಗೊಂಡ 23 ವರ್ಷದೊಳಗಿನವರ ವಿಶ್ವ ಚಾಂಪಿಯನ್‌ಷಿಪ್‌ನಲ್ಲಿ ಮೊದಲ ದಿನ ನಿರಾಸೆ ಅನುಭವಿಸಿದರು.

63 ಕೆ.ಜಿ. ವಿಭಾಗದಲ್ಲಿ ಸ್ಪರ್ಧಿಸಿರುವ ಗೌರವ್‌ ಅವರು ಎಂಟರ ಘಟ್ಟದಲ್ಲಿ 1–8ರಿಂದ ಕಿರ್ಗಿಸ್ತಾನದ ಕುತ್ತುಬೆಕ್‌ ಎ. ಅಬ್ದುರಝಾಕೊವ್‌ ವಿರುದ್ಧ ಪರಾಭವಗೊಂಡರು. 77 ಕೆ.ಜಿ. ವಿಭಾಗದಲ್ಲಿ ಭಾರತವನ್ನು ಪ್ರತಿನಿಧಿಸಿರುವ ಅಂಕಿತ್‌ ಅವರೂ ಇದೇ ಅಂತರದಲ್ಲಿ ಸರ್ಬಿಯಾದ ಝಲನ್‌ ಪೆಕ್‌ ಅವರಿಗೆ ಶರಣಾದರು.

87 ಕೆ.ಜಿ. ವಿಭಾಗದ ಅರ್ಹತಾ ಸುತ್ತಿನಲ್ಲಿ ರೋಹಿತ್‌ ಬುರಾ ಅವರು 0–9ರಿಂದ ಪೇಟನ್‌ ಜೆ. ಜೇಕಬ್‌ಸನ್‌ (ಅಮೆರಿಕ) ವಿರುದ್ಧ ಸೋಲುಂಡರು. ಜೋಗಿಂದರ್‌ ರಾಥಿ ಅವರು 130 ಕೆ.ಜಿ. ವಿಭಾಗದ ಅರ್ಹತಾ ಸುತ್ತಿನಲ್ಲಿ 1–4ರಿಂದ ಉಜ್ಬೇಕಿಸ್ತಾನದ ದಮಿರ್ಖೊನ್‌ ರಖ್ಮತೊವ್‌ ಎದುರು ಸೋತರು.