ಕೊಡವ ಹಾಕಿ: ಸಣ್ಣುವಂಡ ತಂಡಕ್ಕೆ ಜಯ

ವಿರಾಜಪೇಟೆ: ಸಣ್ಣುವಂಡ ಮತ್ತು ಕಡೆಮಾಡ ತಂಡಗಳು ಇಲ್ಲಿ ನಡೆಯುತ್ತಿರುವ ಕೊಡವ ಕೌಟುಂಬಿಕ ಚಾಂಪಿಯನ್ಸ್‌ ಟ್ರೋಫಿ ಹಾಕಿ ಟೂರ್ನಿಯಲ್ಲಿ ಗೆಲುವು ಪಡೆದು ಮುಂದಿನ ಹಂತ ಪ್ರವೇಶಿಸಿದವು.

ಕಾಕೋಟುಪರಂಬು ಮೈದಾನದಲ್ಲಿ ಹಾಕಿ ಕೂರ್ಗ್‌ ಆಶ್ರಯದಲ್ಲಿ ನಡೆಯುತ್ತಿರುವ ಟೂರ್ನಿಯಲ್ಲಿ ಮಂಗಳವಾರ ಸಣ್ಣುವಂಡ ತಂಡ 6-0 ಗೋಲುಗಳಿಂದ ಅಜ್ಜಿನಂಡ ತಂಡವನ್ನು ಸೋಲಿಸಿತು. ಸಣ್ಣುವಂಡ ತಂಡದ ಪರವಾಗಿ ಪೊನ್ನಣ್ಣ ‘ಹ್ಯಾಟ್ರಿಕ್‌’ ಗೋಲು ಗಳಿಸಿದರೆ, 11ರ ಹರೆಯದ ಆಟಗಾರ ಪೂವಯ್ಯ ಎರಡು ಗೋಲು ಗಳಿಸಿದರು. ಇನ್ನೊಂದು ಗೋಲನ್ನು ರಾಜೀವ್ ತಂದಿತ್ತರು.

ಕಡೆಮಾಡ ತಂಡ 2–0 ಗೋಲುಗಳಿಂದ ಪುಟ್ಟಿಚಂಡ ತಂಡದ ವಿರುದ್ಧ ಜಯ ಸಾಧಿಸಿತು. ಎರಡು ಗೋಲುಗಳನ್ನು ಗಳಿಸಿದ ಕುಶಾಲಪ್ಪ ಗೆಲುವಿನ ರೂವಾರಿ ಎನಿಸಿದರು.

ಚಂಗುಲಂಡ ತಂಡ 2-0 ರಲ್ಲಿ ಬಾಚಿರ ತಂಡವನ್ನು ಮಣಿಸಿತು. ವಿಜೇತ ತಂಡದ ಪರವಾಗಿ ಕಿರಣ್ ಹಾಗೂ ಅಜಿತ್ ತಲಾ ಒಂದು ಗೋಲು ತಂದಿತ್ತರು. ಇತರ ಪಂದ್ಯಗಳಲ್ಲಿ ಕಾಳೇಂಗಡ ತಂಡ 5-0 ರಲ್ಲಿ ಪಾಲೆಕಂಡ ತಂಡದ ವಿರುದ್ಧ; ತೀತಮಾಡ 3-0 ರಲ್ಲಿ ಚರುಮಂದಂಡದ ವಿರುದ್ಧ; ಚಪ್ಪಂಡ ತಂಡ 4-1 ರಲ್ಲಿ ಕೂಪದಿರ ವಿರುದ್ಧ ಜಯ ಸಾಧಿಸಿದವು.