ಬ್ಯಾಂಕಾಕ್: ಭಾರತದ ಪಿ.ವಿ.ಸಿಂಧು ಮತ್ತು ಸಮೀರ್ ವರ್ಮಾ ಇಲ್ಲಿ ನಡೆಯುತ್ತಿರುವ ಥಾಯ್ಲೆಂಡ್ ಓಪನ್ ಬ್ಯಾಡ್ಮಿಂಟನ್ ಟೂರ್ನಿಯ ಕ್ವಾರ್ಟರ್ ಫೈನಲ್ ಹಂತಕ್ಕೆ ಲಗ್ಗೆ ಇರಿಸಿದರು. ಗುರುವಾರ ನಡೆದ ಮಹಿಳೆಯರ ವಿಭಾಗದ ಪಂದ್ಯದಲ್ಲಿ ಸಿಂಧು ಮಲೇಷ್ಯಾದ ಕಿಸೋನಾ ಸೆಲ್ವಡುರಯ್ ವಿರುದ್ಧ 21–10, 21–12ರಲ್ಲಿ ಗೆಲುವು ಸಾಧಿಸಿದರು. ಎರಡನೇ ಸುತ್ತಿನ ಈ ಹಣಾಹಣಿ ಕೇವಲ 35 ನಿಮಿಷಗಳಲ್ಲಿ ಮುಕ್ತಾಯಗೊಂಡಿತು.
ವಿಶ್ವ ಕ್ರಮಾಂಕದಲ್ಲಿ 31ನೇ ಸ್ಥಾನದಲ್ಲಿರುವ ಸಮೀರ್ ವರ್ಮಾ 17ನೇ ಕ್ರಮಾಂಕದ ಡೆನ್ಮಾರ್ಕ್ ಆಟಗಾರ ರಸ್ಮಸ್ ಗೆಮ್ಕೆ ವಿರುದ್ಧ 21–12, 21–9ರಲ್ಲಿ ಗೆಲುವು ದಾಖಲಿಸಿದರು. ಮೊದಲ ಸುತ್ತಿನಲ್ಲಿ ಮಲೇಷ್ಯಾದ ಆಟಗಾರ ಎಂಟನೇ ಶ್ರೇಯಾಂಕದ ಲೀ ಜಿ ಜಿಯಾ ಎದುರು ಜಯ ಗಳಿಸಿದ್ದ ಸಮೀರ್ ಕ್ವಾರ್ಟರ್ ಫೈನಲ್ನಲ್ಲಿ ಡೆನ್ಮಾರ್ಕ್ನ ಆ್ಯಂಡರ್ಸ್ ಆ್ಯಂಟನ್ಸೆನ್ ಎದುರು ಸೆಣಸುವರು. ಆ್ಯಂಡರ್ಸ್ ವಾಕ್ ಓವರ್ ಪಡೆದು ಎಂಟರ ಘಟ್ಟ ಪ್ರವೇಶಿಸಿದ್ದಾರೆ.
ಮಿಶ್ರ ಡಬಲ್ಸ್ನಲ್ಲಿ ಭಾರತದ ಅಶ್ವಿನಿ ಪೊನ್ನಪ್ಪ ಮತ್ತು ಸಾತ್ವಿಕ್ ಸಾಯಿರಾಜ್ ರಣಕಿರೆಡ್ಡಿ ಜರ್ಮನಿಯ ಮಾರ್ಕ್ ಲಂಫುಸ್ ಮತ್ತು ಇಸಬೆಲ್ ಹೆರ್ಟಿಚ್ ಜೋಡಿಯನ್ನು 22-20, 14-21, 21-16ರಲ್ಲಿ ಮಣಿಸಿ ಕ್ವಾರ್ಟರ್ ಫೈನಲ್ ಪ್ರವೇಶಿಸಿದರು. ಸಾತ್ವಿಕ್ ಸಾಯಿರಾಜ್ ಪುರುಷರ ಡಬಲ್ಸ್ನಲ್ಲೂ ಅಮೋಘ ಜಯ ಸಾಧಿಸಿದರು. ಚಿರಾಗ್ ಶೆಟ್ಟಿ ಜೊತೆಗೂಡಿ ಆಡುತ್ತಿರುವ ಅವರು ಏಳನೇ ಶ್ರೇಯಾಂಕಿತ ಕೊರಿಯಾ ಆಟಗಾರರಾದ ಚೊಯ್ ಸೊಗ್ಯು ಮತ್ತು ಸಿಯೊ ಸೆಂಗ್ ಜೆ ಅವರನ್ನು 21-18, 23-21ರಲ್ಲಿ ಸೋಲಿಸಿದರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.