ಟೇಬಲ್ ಟೆನಿಸ್: ತನಿಷ್ಕಾ, ಅಥರ್ವಗೆ ಪ್ರಶಸ್ತಿ

ಬೆಂಗಳೂರು: ತನಿಷ್ಕಾ ಕಪಿಲ್‌ ಕಾಲಭೈರವ ಹಾಗೂ ಅಥರ್ವ ನವರಂಗೆ ಅವರು ಕರ್ನಾಟಕ ಸರ್ಕಾರದ ಸಚಿವಾಲಯ (ಕೆಜಿಎಸ್‌) ಕ್ಲಬ್ ಆಯೋಜಿಸಿರುವ ರಾಜ್ಯ ರ‍್ಯಾಂಕಿಂಗ್‌ ಟೇಬಲ್ ಟೆನಿಸ್ ಟೂರ್ನಿಯಲ್ಲಿ ಕ್ರಮವಾಗಿ 17 ವರ್ಷದೊಳಗಿನವರ ಬಾಲಕ ಮತ್ತು ಬಾಲಕಿಯರ ವಿಭಾಗದ ಪ್ರಶಸ್ತಿ ಗೆದ್ದರು.

ಶುಕ್ರವಾರ ನಡೆದ ಫೈನಲ್‌ ಪಂದ್ಯದಲ್ಲಿ, ಅಥರ್ವ 11–9, 6–11, 11–6, 11–2ರಿಂದ ಆರ್ಯ ಎ. ಜೈನ್‌ ಅವರನ್ನು ಸೋಲಿಸಿದರು. ಸೆಮಿಫೈನಲ್ ಪಂದ್ಯಗಳಲ್ಲಿ ಆರ್ಯ 11–7, 11–8, 11–4ರಿಂದ ಗೌರವ್‌ ಗೌಡ ವಿರುದ್ಧ; ಅಥರ್ವ 11–7, 8–11, 11–7, 11–6ರಿಂದ ಆರ್ಣವ್‌ ಎನ್‌ ವಿರುದ್ಧ ಗೆಲುವು ಪಡೆದಿದ್ದರು.

‌ಬಾಲಕಿಯರ ಫೈನಲ್‌ನಲ್ಲಿ ತನಿಷ್ಕಾ 8–11, 11–4, 11–4, 11–5ರಿಂದ ಹಿಮಾಂಶಿ ಚೌಧರಿ ಅವರನ್ನು ಮಣಿಸಿದರು.

ಸೆಮಿಫೈನಲ್ ಪಂದ್ಯಗಳಲ್ಲಿ ಹಿಮಾಂಶಿ 11–5, 11–3, 11–2ರಿಂದ ಪ್ರೇಕ್ಷಾ ಟಿ. ತಿಲಾವತ್‌ ವಿರುದ್ಧ; ತನಿಷ್ಕಾ 11–8, 11–7, 11–8ರಿಂದ ಶಿವಾನಿ ಮಹೇಂದ್ರನ್‌ ವಿರುದ್ಧ ಜಯ ಪಡೆದಿದ್ದರು.