ಮಡಿಲಲ್ಲಿನ ಸೊಪ್ಪು ಸೋಸಿ
ನೀರಿಗಿಟ್ಟು
ಒಂದೊಂದೆ ಮಾತು ಆಡಿದರೆಲ್ಲಿ
ಕರಗುವುದೋ ಅಂತ
ಸಾರೊಳಗೆ ಕಣ್ಣೀರ ಬಸಿದು
ನುಚ್ಚಕ್ಕಿಗೆ ಹಿಟ್ಟಾಕಲು ಮರೆಯದೆ
ಒಲೆಯ ಹೊರಗೆ ಉರಿಯುತ್ತಿದ್ದ ಅಮ್ಮ
ಹಸಿದ ಕರುಳಿಗೆ ತಂಪಾದಳು
ಮೈಸವರಿ
ಮನಸ್ಸಿಗೆ ಬಸಿದ ಮಾತು
ಕೈ ತೋರಿ ಸದಾ ಪುಸ್ತಕಹೊತ್ತಿರುವ
ನಿನ್ನಜ್ಜ ಅಂಬೇಡ್ಕರ್ ಓದಿದ್ದು
ಬೀದಿಬಲ್ಬಿನಲ್ಲೆ ಅಂತೇಳಿ
ಒಂದೊಂದೆ ಪದವ ಎದೆಗಿಟ್ಟು
ಓದಲು ಅಟ್ಟುವಾಗ
ಪುಸ್ತಕ ಹಿಡಿದು ನಡೆಯುವಾಗ
ಅಜ್ಜನೆಂದರೆ ಪುಸ್ತಕ
ಓದುವುದೆಂದರೆ ಅಜ್ಜನಂತಾಗುವ ಹಂಬಲ
ಹೊತ್ತುಟ್ಟುವ ಮೊದಲೇ ಒಕ್ಕಲಿಗ್ಹೋಗಿ
ಧೂಳೆಲ್ಲವ ಕುಡಿದುಣ್ಣುವ ಅಮ್ಮನ ಜೊತೆ
ಪೋಟೊದಿಂದಲೇ ಕಣ್ಣಾಡಿಸುವ ಅಜ್ಜನ ದೃಷ್ಟಿಗೆ
ಅಲಲೆ ಅಂತಲೆ ಜೋಳಿಗೆಯೊಳಗೆ ಕುಂತಿದ್ದ
ಮುದ್ದಾದ ಕನ್ನಡ ಪದಗಳು ಕಾಲವ ಕಡೆದು
ಶಿಕ್ಷಣ ಸಂಘಟನೆ ಹೋರಾಟದ ಪದಕಟ್ಟಿದವು
ಶಾರದಾ ಪೂಜೆ ಸರಸ್ವತಿ ಪೂಜೆಯಲ್ಲಿ
ಮುಟ್ಟಿದರೆ ಮುನಿಯುವ ಮಂದಿಯೊಳಗೆ
ಅಜ್ಜನ ಹೆಸರೆತ್ತಿ ಕೈ ಮುಗಿಯಲು ಕಲಿಸಿದ
ಅಮ್ಮನ ಬೆವರು
ಪದಗಳ ನಾಡಿ ಹಿಡಿದು
ಅನ್ನಕ್ಕಿಂತ ಅಕ್ಷರಲೇಸು ಅಂದಾಗ
ಅಜ್ಜನ ಎಡೆಯಲ್ಲಿ ಅರಳಿರುವ
ಸೊಸೈಟಿ ಅಕ್ಕಿಯು ನಾಚಿಕೊಂಡಿತು
ಊರು ಬಾಯಿ ಹಲುಬಿದರು
ತಲೆಯೆತ್ತಿ ನಡೆಯಲೆಂದು
ಕತ್ತಲ ಗೂಡಲ್ಲಿ ಬೆಳಗುವ ಬಲ್ಬಿನಡಿ
ಓದಲು ಅಡರಿಕೊಂಡವನ ಎದರಿಗೆ
ಸರಿವೊತ್ತಾದರು ಅಮ್ಮ ಕುಂತಿದ್ದಾಳೆ ಅಜ್ಜನಾಗಿ
ಬೆರಳಿಗೊಂದೊಂದು ನವಿಲುಗರಿಯ ತೊಟ್ಟು
ಅಯಾಸಗೊಂಡ ಕಣ್ರೆಪ್ಪೆಗಳು
ಮುದ್ದೆಗೋರುವ ಸದ್ದಿಗೆ ಬಿರಿದು
ಕಾಳಿನೆಸರ ಎದೆಗೆಳೆದುಕೊಂಡು
ಮೈಮುರಿದ ಪೆನ್ನಿಗೆ ಕೈಯಾಡಿಸಿ
ಒಪ್ಪ ಓರಣವ ಮಾಡಿ ತಟ್ಟೆಯೊಳಗಿನ ಮುದ್ದೆಯ
ಹೊಟ್ಟೆಯೊಳಗಿಟ್ಟುಕೊಂಡವನಿಗೆ ಬಸ್ಸಿಗೆ ಕಾಸು
ಅಮ್ಮನೆ ಕೈಗಿಡುವಾಗಲು ಅಜ್ಜನ ಕಣ್ಗಾವಲು
ನಡುಬಾಗಿ ದುಡಿವ ತಲೆಯೆತ್ತಿ ನಡೆವ
ಅಮ್ಮನ ಕೈಕಾಲು ಆಡದ
ಹೊಲ ಮನೆಯೆಲ್ಲಿದೆ ಊರೊಳಗೆ
ಕೇರಿದ ಬೀಸಿದ ಸಾರಿಸಿದ ಅಂಗಳದಲ್ಲಿ
ಅಮ್ಮನೆ ಆಡಿದ ಆಡದ ಸಕಲವ ಗುಡಿಸಿ
ಒಕ್ಕಲು ತಿಪ್ಪೆಗಳಲ್ಲಿ ಸುರಿದ
ಬೂದಿಯಂತೆ ಅದರೊಳಗಿನ ಉರಿಯಂತೆ
ಮನೆ ಪೂರ ತಣ್ಣಗೆ ಒಳಗೊಳಗೆ ಬೆಚ್ಚಗೆ
ಸುಳಿದಾಡುವ ಅಮ್ಮನಿಂದಲೆ ಅಜ್ಜನೂ ಅರಿವಾದ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.