ಗೂಡು ಕಟ್ಟೋ ಮುನ್ನವೆ
ಗುಬ್ಬಿಯೊಂದು ಹೆತ್ತಿತು
ಹಾದಿಬದಿಯ ಹುಲ್ಲಮೇಲೆ
ಮೊಟ್ಟೆಯಿಟ್ಟು ಬಿಟ್ಟಿತು
ಪುಟ್ಟದಾದ ಮುದ್ದು ಮೊಟ್ಟೆ
ಹಕ್ಕಿ ಹೇಗೆ ಬಿಟ್ಟೀತು
ಕರುಳ ಕುಡಿಯ ಪ್ರೀತಿಯಿಂದ
ತಬ್ಬಿಹಿಡಿದು ಕೊಂಡಿತು
ಕಾವುಕೊಡಲು ತಾವು ಎಲ್ಲಿ
ಹಾವು ಗೀವು ಬಂದರಿಲ್ಲಿ
ಹೆದರಿಕೊಂಡು ಗುಬ್ಬಿ ಹಕ್ಕಿ
ಅತ್ತು ಬಿಡ್ತು ಬಿಕ್ಕಿ ಬಿಕ್ಕಿ
ಗುಬ್ಬಿ ಬಿಕ್ಕಿ ಅಳುವ ಕೇಳಿ
ಕಾಗೆ ಬಂದು ಮೊಟ್ಟೆ ಹೆಕ್ಕಿ
ತನ್ನ ಮಡಿಲಲವಚಿಕೊಂಡು
ಗುಬ್ಬಿ ಯನ್ನು ತಬ್ಬಿತು
ಕಾಗೆ ಗೂಡು ಸೇರಿ ಗುಬ್ಬಿ
ತನ್ನ ಮೊಟ್ಟೆ ಕಾಗೆ ಮೊಟ್ಟೆ
ಒಟ್ಟಿಗಿಟ್ಟು ಕಾವುಕೊಟ್ಟು
ಮರಿಯ ಕನಸ ಕಂಡವು
ಮೊಟ್ಟೆಯಿಂದ ಮರಿಗಳು
ತಟ್ಟನೆದ್ದು ಬಂದವು
ಕಾಗೆ ಮರಿಗಳು... ಗುಬ್ಬಿ ಮರಿಗಳು
ಮರಿಗಳೋ... ಮರಿಗಳು...
ಆಹಾ ಮರಿಗಳೋ... ಮರಿಗಳು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.