ಹೊಸ ವರ್ಷದ ಶುಭಾಶಯ

ಹೊಸ ವರ್ಷಕೆ ಹಬ್ಬವ ಮಾಡಲು
ಹರುಷದಿ ಬಂದವು ಪ್ರಾಣಿಗಳು
ನದಿಯ ದಡದಲಿ ಕಾಡಿನ ಬನದಲಿ
ಹಾರುತ ಇಳಿದವು ಹಕ್ಕಿಗಳು

ದಿನ ದಿನ ಕೂಡಿಸಿ ಇಟ್ಟ ಜೇನನು
ತಟ್ಟನೆ ತಂದಿತು ಕರಡಿಯಣ್ಣ
ಸಕ್ಕರೆ ಮಾತಿನ ಅಕ್ಕರೆ ಅರಗಿಣಿ
ಪಕ್ಕಕೆ ಇಟ್ಟಿತು  ಮಾವನ್ನ

ಮಲ್ಲಿಗೆ ಸಂಪಿಗೆ ಹೂಗಳ ಹೊತ್ತು
ಹಾರುತ ಬಂದಿತು ಚಿಟ್ಟಿ ಅಕ್ಕ
ನವಣಿ ಸಜ್ಜಿ ರಾಗಿ ಕಡಲೆ
ಕೊಟ್ಟು ನಕ್ಕಿತು ಗುಬ್ಬಕ್ಕ

ಟೊಂಗೆ ಜಿಗಿಯುತ ಬಾಲ ಬಡಿಯುತ
ನೇರಳೆ ತಂದಿತು ಮಂಗಣ್ಣ
ಮರಿಗಳ ಮಾಡಲು ಇಟ್ಟ ಮೊಟ್ಟೆ
ಕೋಳಿ ಕೊಟ್ಟಿತು ಕೇಳಣ್ಣ

ಹರಿಯುವ ನೀರಲಿ ತೇಲುತ ನಿಂತೆ
ನೀಡಿತು ಮೀನು ಕಮಲವನು
ಬಡ ಬಡ ಓಡಿ ನೆಲವನು ಕೆದರಿ
ತಂದಿತು ಗಜ್ಜರಿ ಮೊಲ ತಾನು

ಕಬ್ಬಿನ ಗಳಗಳ  ಹೊತ್ತ ಹೊರೆಯನು
ಬಾಗಿ ಇಳಿಸಿತು ಮರಿಯಾನೆ
ಹಸುರಿನ ಹುಲ್ಲನು ಮೇಯುತ ನಿಂತ
ಹಸುವು ಕೊಟ್ಟಿತು ಹಾಲನ್ನು
ಅಬ್ಬರವಿಲ್ಲದೆ ಗದ್ದಲವಿಲ್ಲದೆ
ನಿಂತು ಹೇಳಿತು  ಹುಲಿ ತಾನು
ಹುಲಿಯ ವೇಷಕೆ ಬಾಡಿಗೆ ಪಡೆಯದೆ
ಹೆಜ್ಜೆ ಹಾಕುವೆ ಸಾಕೇನು?

ಎತ್ತು ಕತ್ತೆ ಎಮ್ಮೆ ಕಡವೆ
ಕೂಡಿ ತಂದವು ಬಾಳೆ ಗೊನೆ
ಬೆಳವಲ ಹಣ್ಣು ಬಾರಿ ರುಚಿಯು
ತಿನ್ನಿರಿ ಎಂದಿತು ಕರಿ ಗೂಬೆ
ಠಕ್ಕ ನರಿಯು ತಂಟೆ ಮಾಡದೆ
ಕಿತ್ತು ತಂದಿತು ಸಿಹಿ ದ್ರಾಕ್ಷಿ
ಅನ್ನದ ಕಾಳನು ಬಳ ಬಳ ಉದುರಿಸಿ
ಬಳಗವ ಕರೆಯಿತು ಹಿರಿ ಕಾಗಿ

ಒಲವಿನ ರಾಗದಿ ಕೋಗಿಲೆ ಗಾಯನ
ಕೇಳುತ ಉಂಡವು ಖುಶಿಯಿಂದ
ತೊಡೆಯ ಮೇಲೆ ಮೊಲವನು ಕೂಡಿಸಿ
ಮುತ್ತು ಕೊಟ್ಟಿತು ಹುಲಿಯೊಂದ.
ಸಾಧು ಸಾಕು ಕಾಡಿನ ಪ್ರಾಣಿ
ಭೇದವೆ ಇಲ್ಲದೆ ಆಡಿದವು
ಒಬ್ಬರಿಗೊಬ್ಬರು ಕೂಡಿಸಿ ಉಣಿಸಿ
ಹೊಸ ವರುಷದ ಹಬ್ಬ ಮಾಡಿದವು

ಮೃಗಗಳ ಎದೆಯಲಿ ಸವಿ ಸವಿ ಮಾತು
ಹೂವಿನ ಕಿರುನಗು ತುಟಿಯಲಿ
ಜೇನಿನ ಹುಟ್ಟನು ಕೈಯಲಿ ಹಿಡಿದು
ತಂದಿವೆ ಶುಭಾಶಯ ನಾಡಿನಲಿ