ಸಗಟು ಹಣದುಬ್ಬರ 6 ತಿಂಗಳ ಗರಿಷ್ಠ

ನವದೆಹಲಿ: ಸಗಟು ಹಣದುಬ್ಬರವು ಅಕ್ಟೋಬರ್‌ ತಿಂಗಳಿನಲ್ಲಿ ಆರು ತಿಂಗಳ ಗರಿಷ್ಠ ಮಟ್ಟವಾದಶೇ 3.59ಕ್ಕೆ ಏರಿಕೆ ಕಂಡಿದೆ.

ಸಗಟು ದರ ಸೂಚ್ಯಂಕದ (ಡಬ್ಲ್ಯುಪಿಐ) ಆಧಾರದ ಮೇಲೆ ಲೆಕ್ಕ ಹಾಕುವ ಹಣದುಬ್ಬರ, ಸೆಪ್ಟೆಂಬರ್‌ನಲ್ಲಿ ಶೇ 2.60ರಷ್ಟಿತ್ತು. ಇದಕ್ಕೆ ಹೋಲಿಸಿದರೆ ಶೇ 0.99ರಷ್ಟು ಏರಿಕೆಯಾಗಿದೆ.

ಈರುಳ್ಳಿ ಮತ್ತು ತರಕಾರಿಗಳ ಬೆಲೆ ಹೆಚ್ಚಾಗಿರುವುದರಿಂದ ಸಗಟು ಹಣದುಬ್ಬರ ಏರಿಕೆ ಕಂಡಿದೆ ಎಂದು ಕೇಂದ್ರ ಸಾಂಖ್ಯಿಕ ಮತ್ತು ಕಾರ್ಯಕ್ರಮ ಅನುಷ್ಠಾನ ಸಚಿವಾಲಯ ತಿಳಿಸಿದೆ.

ಚಿಲ್ಲರೆ, ಸಗಟು ಹಣದುಬ್ಬರಗಳೆರಡೂ ಭಾರಿ ಏರಿಕೆ ಕಂಡಿವೆ. ಕೈಗಾರಿಕಾ ಪ್ರಗತಿ ಸೂಚ್ಯಂಕ ಶೇ 3.8ಕ್ಕೆ ಇಳಿದಿದೆ. ಹೀಗಾಗಿ ಡಿಸೆಂಬರ್‌‘ನಲ್ಲಿ ಆರ್‌ಬಿಐ ನಡೆಸಲಿರುವ ಹಣಕಾಸು ನೀತಿ ಪರಾಮರ್ಶೆಯಲ್ಲಿ ಬಡ್ಡಿದರ ಇಳಿಸುವ ನಿರೀಕ್ಷೆ ವ್ಯಕ್ತವಾಗಿದೆ.