60 ದಿನಗಳ ಕಲಾಪಕ್ಕೆ ₹ 63 ಕೋಟಿ ಖರ್ಚು!

ಬೆಳಗಾವಿ: ಈಗಿನ ಚಳಿಗಾಲದ ಅಧಿವೇಶನ ಹೊರತುಪಡಿಸಿ ಇದುವರೆಗೆ ಬೆಳಗಾವಿಯಲ್ಲಿ ಏಳು ಬಾರಿ ವಿಧಾನಮಂಡಲದ ಅಧಿವೇಶನ ನಡೆದಿದೆ. ಈ ಅವಧಿಯಲ್ಲಿ 60 ದಿನ ಕಲಾಪ ನಡೆದಿದ್ದು, ₹ 63.36 ಕೋಟಿ ವೆಚ್ಚವಾಗಿದೆ ಎಂದು ಮಾಹಿತಿ ಹಕ್ಕು ಕಾರ್ಯಕರ್ತ ಭೀಮಪ್ಪ ಗಡಾದ ಹೇಳಿದ್ದಾರೆ.

ಮಾಹಿತಿ ಹಕ್ಕು ಕಾಯ್ದೆಯಡಿ ಪಡೆದಿರುವ ಮಾಹಿತಿಯನ್ನು ಬುಧವಾರ ಮಾಧ್ಯಮಗಳಿಗೆ ಬಿಡುಗಡೆ ಮಾಡಿದ ಅವರು, ‘ಬೆಳಗಾವಿ ಅಧಿವೇಶನದ ಕಲಾಪ ನಡೆಸಲು ಪ್ರತಿದಿನ ಸರಾಸರಿ ಒಂದು ಕೋಟಿ ವೆಚ್ಚ ಮಾಡಲಾಗಿದೆ. ಆದರೆ, ಉತ್ತರ ಕರ್ನಾಟಕದ ಅಭಿವೃದ್ಧಿಯ ಬಗ್ಗೆ ಚರ್ಚೆ ಆಗಿರುವುದು ತೀರಾ ಕಡಿಮೆ’ ಎಂದು ಟೀಕಿಸಿದ್ದಾರೆ.

ಕರದಂಟಿಗೆ ₹77 ಸಾವಿರ: ‘2006ರ ಸೆ.25ರಿಂದ ಐದು ದಿನಗಳ ಕಾಲ ಮೊದಲ ಅಧಿವೇಶನ ನಡೆಯಿತು. ರಸ್ತೆ ಅಭಿವೃದ್ಧಿ, ಸಭಾಭವನ ನಿರ್ಮಾಣ, ಊಟ, ವಾಹನ, ವಾಸ್ತವ್ಯಕ್ಕಾಗಿ ₹5 ಕೋಟಿ ವೆಚ್ಚ ಮಾಡಲಾಗಿತ್ತು. ಕರದಂಟು ಹಾಗೂ ಲಾಡು ಖರೀದಿಸಲು ₹77 ಸಾವಿರ ಖರ್ಚು ಮಾಡಲಾಗಿದೆ’ ಎಂದು ಅವರು ವಿವರಿಸಿದ್ದಾರೆ.

‘ಅಧಿವೇಶನ ಸಂದರ್ಭದಲ್ಲಿ ಮಧ್ಯಾಹ್ನದ ಊಟ ಹಾಗೂ ಕುಡಿಯುವ ನೀರಿನ ವೆಚ್ಚದ ಮಾಹಿತಿ ನೀಡಲು ಸಚಿವಾಲಯದ ಅಧಿಕಾರಿಗಳು ನಿರಾಕರಿಸಿದ್ದಾರೆ’ ಎಂದು ತಿಳಿಸಿದ್ದಾರೆ.