ಬಾಲಭವನದ ಅಭಿವೃದ್ಧಿಗೆ ರೂ 2 ಕೋಟಿ: ಸುಧಾಮೂರ್ತಿ

ಬೆಂಗಳೂರು: ‘ನಗರದ ಬಾಲಭವನದ ಅಭಿವೃದ್ಧಿಗಾಗಿ ರೂ 2 ಕೋಟಿ ನೀಡಲಾ­ಗು­ವುದು.  ಬಾಲಭವನದ  ನವೀಕರಣ ಕಾರ್ಯವನ್ನು ಸದ್ಯದಲ್ಲಿಯೇ ಕೈಗೊಳ್ಳ­ಲಾ­­ಗುವುದು’ ಎಂದು  ಇನ್ಫೊಸಿಸ್‌ ಪ್ರತಿಷ್ಠಾನದ ಅಧ್ಯಕ್ಷೆ ಸುಧಾಮೂರ್ತಿ ತಿಳಿಸಿದರು.

ಇನ್ಫೊಸಿಸ್‌ ಪ್ರತಿಷ್ಠಾನವು ನಗರದ ಬಾಲಭವನದ ಆವರಣದಲ್ಲಿ ಗುರು­ವಾರ ಹಮ್ಮಿಕೊಂಡಿದ್ದ ಬಸ್‌ ಹಸ್ತಾಂತರ ಸಮಾರಂಭದಲ್ಲಿ ಅವರು ಮಾತನಾಡಿದರು.

‘ಮಕ್ಕಳಿಗೆ ಉತ್ತಮ ಸೌಲಭ್ಯ   ಒದಗಿ­ಸಲು ಪ್ರತಿಷ್ಠಾನವು ಮುಂದಾಗಿದೆ. ಬೆಂಗ­ಳೂರು ಬಾಲಭವನಕ್ಕೆ ಒಂದು ಬಸ್‌  ಹಸ್ತಾಂ­ತರ ಮಾಡಲಾಗಿದೆ. ಮುಂದಿನ ದಿನಗಳಲ್ಲಿ ಧಾರವಾಡ, ಉಡುಪಿ ಮತ್ತು ಬೀದರ್ ಜಿಲ್ಲಾ ಬಾಲಭವನ­ಗಳಿಗೆ  ತಲಾ ಒಂದು ಬಸ್‌  ನೀಡಲಾಗು­ವುದು’ ಎಂದು ಭರವಸೆ ನೀಡಿದರು.

ಸಚಿವೆ ಉಮಾಶ್ರೀ ಮಾತನಾಡಿ, ‘ಬಾಲಭವನ ಸೊಸೈಟಿಯು ಮಕ್ಕಳಲ್ಲಿ  ಕ್ರಿಯಾತ್ಮಕ ಹಾಗು ಸೃಜನಾತ್ಮಕ ಬೆಳವಣಿಗೆಗೆ ಪೂರಕವಾಗಿ ಕಾರ್ಯನಿ­ರ್ವ­ಹಿಸುತ್ತಿದೆ. ಈ ಕಾರ್ಯಕ್ಕೆ  ಬಲತುಂಬುವ ನಿಟ್ಟಿನಲ್ಲಿ ಸುಧಾ­ಮೂರ್ತಿ­ಯವರು  ಬಸ್‌ ನೀಡುವುದರ ಮೂಲಕ  ಬಾಲಭವನದ ಅಭಿವೃದ್ಧಿಗೆ ಸಹಕಾರ ನೀಡಿರುವುದು ಶ್ಲಾಘನೀಯ’ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದರು.

40 ಆಸನವುಳ್ಳ ಬಸ್‌ ಇದಾಗಿದೆ. ಭವನವು ಏರ್ಪಡಿಸುವ  ಮಕ್ಕಳ ಬೇಸಿಗೆ ಶಿಬಿರ ಹಾಗೂ ಸಾಂಸ್ಕೃತಿಕ ಕಾರ್ಯ­ಕ್ರಮಗಳಿಗೆ ಈ ಬಸ್‌ ಅನ್ನು ಬಳಸಿಕೊಳ್ಳಲಾಗುವುದು ಎಂದು ಅಧಿಕಾರಿಯೊಬ್ಬರು ತಿಳಿಸಿದರು.

ಕಾರ್ಯಕ್ರಮದಲ್ಲಿ  ಉಡುಪಿ ಶಾಸಕ ಪ್ರಮೋದ್ ಮಧ್ವರಾಜ್,  ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಇಲಾಖೆಯ ಪ್ರಧಾನ ಕಾರ್ಯದರ್ಶಿ ಡಾ.ಅಮಿತಾ ಪ್ರಸಾದ್, ಬಾಲಭವನ ಸೊಸೈಟಿಯ ಕಾರ್ಯದರ್ಶಿ ಎನ್.ಪಂಕಜ ಇದ್ದರು.