ರಾಜ್ಯ ಸರ್ಕಾರಕ್ಕೆ ಬಿಐಎಎಲ್‌ ಪತ್ರ

ಬೆಂಗಳೂರು: ಯಲಹಂಕ ಸಮೀಪದ ಮಾವಳ್ಳಿಪುರದಲ್ಲಿ ತ್ಯಾಜ್ಯ ವಿಲೇವಾರಿ ಮಾಡಲು ಯಾವುದೇ ಕಾರಣಕ್ಕೂ ಅವಕಾಶ ನೀಡಬಾರದು ಎಂದು ಒತ್ತಾಯಿಸಿ ರಾಜ್ಯ ಸರ್ಕಾರಕ್ಕೆ ಬೆಂಗಳೂರು ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣ ಲಿಮಿಟೆಡ್ (ಬಿಐಎಎಲ್) ಪತ್ರ ಬರೆದಿದೆ.

ತ್ಯಾಜ್ಯ ವಿಲೇವಾರಿ ಮಾಡುವು-ದರಿಂದ ಪಕ್ಷಿಗಳ ಕಾಟ ಹೆಚ್ಚಾಗಿ ವಿಮಾನ ಹಾರಾಟಕ್ಕೆ ತೊಂದರೆಯಾಗ-ಬಹುದು ಎಂಬ ಆತಂಕದಿಂದ ಬಿಐಎಎಲ್‌ ಈ ಕ್ರಮ ಕೈಗೊಂಡಿದೆ.

ಡಿಸೆಂಬರ್‌ 1ರ ಬಳಿಕ ನಗರದ ಹೊರವಲಯದಲ್ಲಿರುವ ಮಂಡೂರಿಗೆ ತ್ಯಾಜ್ಯ ಸಾಗಣೆಯನ್ನು ರದ್ದುಗೊಳಿಸುತ್ತಿರುವುದರಿಂದ ಪರ್ಯಾಯ ಕ್ರಮವಾಗಿ ಬೃಹತ್‌ ಬೆಂಗಳೂರು ಮಹಾನಗರ ಪಾಲಿಕೆಯು (ಬಿಬಿಎಂಪಿ) ಮಾವಳ್ಳಿಪುರದಲ್ಲಿ ತ್ಯಾಜ್ಯ ವಿಲೇವಾರಿಗೆ ಅವಕಾಶ ಮಾಡಿಕೊಡುವಂತೆ ರಾಜ್ಯ ಮಾಲಿನ್ಯ ನಿಯಂತ್ರಣ ಮಂಡಳಿಯನ್ನು (ಕೆಎಸ್‌ಪಿಸಿಬಿ) ಸಂಪರ್ಕಿಸಿದೆ ಎನ್ನಲಾಗಿದೆ.

‘ಕಸ ವಿಲೇವಾರಿ ಕಾರಣ ಕೆಂಪೇ-ಗೌಡ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣ-ದಲ್ಲಿ (ಕೆಐಎ) ಪಕ್ಷಿಗಳ ಹಾರಾಟ ಹೆಚ್ಚಾಗಿ ವಿಮಾನಗಳಿಗೆ ಬಡಿ-ಯುವ ಆತಂಕವಿರುತ್ತದೆ. ಸನಿಹದಲ್ಲಿ-ರುವ ಭಾರತೀಯ ವಾಯುಪಡೆ ನೆಲೆ (ಐಎಎಫ್‌) ಮೇಲೂ ಪರಿಣಾಮ ಉಂಟಾಗುವ ಭಯವಿದೆ’ ಎಂದು ವಿಮಾನ ನಿಲ್ದಾಣದ ಕಾರ್ಯಾಚರಣೆ ವಿಭಾಗದ ಅಧ್ಯಕ್ಷ ಹರಿ ಕೆ.ಮಾರರ್‌್ ಕಳವಳ ವ್ಯಕ್ತಪಡಿಸಿದರು.

ಈ ಹಿಂದೆ ಪಾಲಿಕೆಯು ಮಾವಳ್ಳಿ-ಪುರ-ದಲ್ಲಿ ಕಸ ವಿಲೇವಾರಿ ಮಾಡು-ತಿತ್ತು. ಆದರೆ, ಅಂತರ್ಜಲ ಮಾಲಿನ್ಯ-ವಾಗು-ತ್ತಿದೆ ಎಂದು ಆರೋಪಿಸಿ ಸ್ಥಳೀಯರು ಪ್ರತಿಭಟನೆ ನಡೆಸಿದ್ದರಿಂದ ಈ ಪ್ರದೇಶದಲ್ಲಿ ಕಸ ವಿಲೇವಾರಿ ಮಾಡದಂತೆ 2012ರ ಜುಲೈನಲ್ಲಿ ಕೆಎಸ್‌ಪಿಸಿಬಿಯು ಸೂಚಿಸಿತ್ತು.

ವೈಮಾನಿಕ ದೂರವನ್ನು ಗಣನೆಗೆ ತೆಗೆದುಕೊಂಡರೆ ಮಾವಳ್ಳಿಪುರವು ಕೆಐಎನಿಂದ 18 ಕಿ.ಮೀ. ದೂರದಲ್ಲಿದೆ. ಐಎಎಫ್‌ ನೆಲೆ ಈ ಗ್ರಾಮಕ್ಕೆ ಮತ್ತಷ್ಟು ಸನಿಹವಾಗಿದೆ.

ಕೆಐಎಲ್‌ನಲ್ಲಿ ತ್ಯಾಜ್ಯ ಪ್ರಮಾಣ ಹೆಚ್ಚುತ್ತಿದ್ದರೂ ಸದ್ಯಕ್ಕೆ ಯಾವುದೇ ಸಮಸ್ಯೆ ಇಲ್ಲ. ಏಕೆಂದರೆ ಇಲ್ಲಿರುವ ಸಮರ್ಪಕ ತ್ಯಾಜ್ಯ ನಿರ್ವಹಣಾ ವ್ಯವಸ್ಥೆ. ಅಂದಾಜು 9ರಿಂದ 10 ಟನ್‌ ಘನತ್ಯಾಜ್ಯ ಸಂಗ್ರಹವಾಗುತ್ತಿದ್ದು, ಅದನ್ನು ನಿಲ್ದಾಣದ ಆಂತರಿಕ ಘಟಕದಲ್ಲಿ ವಿಲೇವಾರಿ ಮಾಡಿ ಟೆರ್ರಾ ಸಂಸ್ಥೆಯ ತ್ಯಾಜ್ಯ ಸಂಸ್ಕರಣೆ ಘಟಕಕ್ಕೆ ಸಾಗಣೆ ಮಾಡಲಾಗುತ್ತಿದೆ. ಈ ಪ್ರಕ್ರಿಯೆಯು ಬಿಐಎಎಲ್‌ ಕೈಗೆತ್ತಿಕೊಂಡಿರುವ ‘ಹಸಿರು ಸ್ನೇಹಿ ಆಂದೋಲನ’ದ ಭಾಗವಾಗಿದೆ.