ವಿಭಜಕಕ್ಕೆ ಬೈಕ್ ಡಿಕ್ಕಿ: ಸಾವು

ಬೆಂಗಳೂರು: ಕೆ.ಆರ್.ಪುರ ತೂಗು ಸೇತುವೆ ಬಳಿ ಗುರುವಾರ ನಸುಕಿನ ವೇಳೆ ರಸ್ತೆ ವಿಭಜಕಕ್ಕೆ ಬೈಕ್ ಡಿಕ್ಕಿಯಾಗಿ ಮೆಕ್ಯಾನಿಕಲ್ ಎಂಜಿನಿಯರಿಂಗ್ ವಿದ್ಯಾರ್ಥಿ ಜಿಮ್ಶನ್ ಜಾಯ್ (21) ಎಂಬುವರು ಮೃತಪಟ್ಟಿದ್ದು, ಅವರ ಸಹಪಾಠಿ ಅಭಿಲಾಷ್ (22) ಗಾಯಗೊಂಡಿದ್ದಾರೆ.

 ಕೇರಳ ಮೂಲದ ಜಿಮ್ಶನ್ ಹಾಗೂ ಅಭಿಲಾಷ್, ಕೆ.ಆರ್. ಪುರದ ಸೌತ್ ಈಸ್ಟ್‌ ಏಷ್ಯನ್‌ ಕಾಲೇಜಿನಲ್ಲಿ ಓದುತ್ತಿದ್ದರು. ರಾತ್ರಿ ಸ್ನೇಹಿತನ ಮನೆಗೆ ಹೋಗಿದ್ದ ಇಬ್ಬರೂ, ಅಲ್ಲಿಂದ 3 ಗಂಟೆಗೆ ಬೈಕ್‌ನಲ್ಲಿ ಮನೆಗೆ ಮರಳುತ್ತಿದ್ದರು.

ವೇಗವಾಗಿ ಬೈಕ್ ಓಡಿಸಿಕೊಂಡು ಬಂದಿರುವ ಅಭಿಲಾಷ್, ತೂಗು ಸೇತುವೆ ಬಳಿ ನಿಯಂತ್ರಣ ಕಳೆದುಕೊಂಡು ವಿಭಜಕಕ್ಕೆ ಡಿಕ್ಕಿ ಮಾಡಿದ್ದಾರೆ. ಆಗ ಇಬ್ಬರೂ ಕೆಳಗೆ ಬಿದ್ದಿದ್ದು, ತಲೆಗೆ ಗಂಭೀರ ಪೆಟ್ಟು ಬಿದ್ದಿದ್ದರಿಂದ ಜಿಮ್ಶನ್ ಸ್ಥಳದಲ್ಲೇ ಸಾವನ್ನಪ್ಪಿದ್ದಾರೆ.