ಜೋಡುಪಾಲ ಜಲಪಾತದ ಸೊಬಗು

ನಾಪೋಕ್ಲು: ಎರಡು ದಿನಗಳಿಂದ ಮಳೆ ಬಿರುಸುಗೊಂಡಿದ್ದು ಜಿಲ್ಲೆಯ ಪ್ರವಾಸಿ ತಾಣಗಳೆಲ್ಲವೂ ಸೌಂದರ್ಯವನ್ನು ಹೆಚ್ಚಿಸಿಕೊಂಡು ಮನಮೋಹಕವಾಗಿದೆ. ಮಳೆ ಹೆಚ್ಚಿದಂತೆ ಜಲಪಾತಗಳು ಭೋರ್ಗರೆಯುತ್ತಿವೆ.

ಸಾಲು ಸಾಲು ರಜೆಗಳಲ್ಲಿ ಮಳೆ, ಚಳಿಗೆ ಮೈಯೊಡ್ಡಲು ಮಳೆಗಾಲದಲ್ಲಿ ಜಿಲ್ಲೆಗೆ ಆಗಮಿಸುವ ಪ್ರವಾಸಿಗರನ್ನು ಜಿಲ್ಲೆಯ ಜಲಪಾತಗಳು ಸೆಳೆಯುತ್ತಿವೆ. ರಭಸದ ಮಳೆಗೆ ಬೆಟ್ಟಗುಡ್ಡಗಳಿಂದ ಧುಮ್ಮಿಕ್ಕುವ ಹತ್ತಾರು ಜಲಧಾರೆಗಳು ಜಲಪಾತಗಳಾಗಿ ರೂಪುತಳೆಯುತ್ತವೆ.

ಅಂತಹ ಒಂದು ಪ್ರಮುಖ ಜಲಪಾತ ಜೋಡುಪಾಲ ಜಲಪಾತ. ಇದು ಮಡಿಕೇರಿ–ಮಂಗಳೂರು ಮುಖ್ಯರಸ್ತೆಯಲ್ಲಿದೆ.ಮಡಿಕೇರಿಯಿಂದ ಸುಳ್ಯದ ಕಡೆಗೆ ತೆರಳುವ ಪ್ರಯಾಣಿಕರನ್ನು ಆಕರ್ಷಿಸುತ್ತಿದೆ. ಮಡಿಕೇರಿಗೆ ಜಲಪಾತಗಳನ್ನು ಕಣ್ತುಂಬಿಕೊಳ್ಳಲು ಬರುವ ಪ್ರವಾಸಿಗರಿಗೂ ಇದು ಆಕರ್ಷಕವಾಗಿ ಸೆಳೆದಿದೆ.