ಗಂಗಾವತಿ: ತಾಲ್ಲೂಕಿನ ಶ್ರೀರಾಮನಗರದಲ್ಲಿ ಮಂಗಳವಾರ ರೈತರೊಬ್ಬರ ಹಸು ಮೂರು ಕರುಗಳಿಗೆ ಜನ್ಮ ನೀಡಿದೆ! ಗ್ರಾಮದ ಐದನೇ ವಾರ್ಡ್ ಬಂಜಾರ ಕಾಲೊನಿಯ ಡ್ಯಾಗಲ ಮುನಿಶ್ವರರಾವ್ ಅವರು ಸಾಕಿದ 12 ವರ್ಷದ ಜರ್ಸಿ ಆಕಳು, ಎರಡು ಗಂಡು, ಒಂದು ಹೆಣ್ಣು ಕರುವನ್ನು ಹಾಕಿದೆ. ಕರುಗಳು ಹಾಗೂ ಆಕಳು ಆರೋಗ್ಯವಾಗಿವೆ. ಒಂದೊಂದು ಕರು ಕನಿಷ್ಠ 10 ರಿಂದ 12 ಕೆ.ಜಿ ಇವೆ. ಎಲ್ಲ ಅವಯವಗಳು ಸರಿಯಾಗಿವೆ.
ಕಳೆದ ಹಲವು ವರ್ಷದಿಂದ ಜಾನುವಾರು ವ್ಯಾಪಾರ ಮಾಡುತ್ತಿರುವ ಕೃಷಿಕ ಮುನಿಶ್ವರರಾವ್, ಸುಮಾರು ₹70 ಸಾವಿರಕ್ಕೆ ಈ ಆಕಳನ್ನು ಖರೀದಿಸಿದ್ದರು.
ಸಹಜವಾಗಿ ಶೇ 97ರಷ್ಟು ಜಾನುವಾರು ಒಂದು ಕರುವಿಗೆ ಜನ್ಮ ನೀಡುತ್ತವೆ. ಶೇ 2ರಷ್ಟು ಅವಳಿ ಕರುಗಳಿಗೆ ಜನ್ಮ ನೀಡುತ್ತವೆ. ಆದರೆ, ತ್ರಿವಳಿ ಕರುಗಳಿಗೆ ಹಸು ಜನ್ಮ ನೀಡುವುದು ಅತಿ ಅಪರೂಪ ಎಂದು ಗ್ರಾಮದ ಕೃಷಿಕರು ಅಚ್ಚರಿ ವ್ಯಕ್ತಪಡಿಸಿದ್ದಾರೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.