ಕಂದಾಯ ಸಚಿವ ಕಾಗೋಡು ಹೇಳಿಕೆಗೆ ಖಂಡನೆ

‘ಕಂದಾಯ ಸಚಿವರು ಹೋದ ಕಡೆಗಳೆಲ್ಲ ಅರಣ್ಯ ಮುಖ್ಯ ಅಲ್ಲ ಎನ್ನುತ್ತ ಅರಣ್ಯ ಪ್ರದೇಶ ಒತ್ತುವರಿಗೆ ಪ್ರಚೋದನೆ ನೀಡುವ ಹೇಳಿಕೆ ನೀಡುತ್ತಾರೆ. ಆ ಮೂಲಕ ರಾಜ್ಯ ಮತ್ತು ಕೇಂದ್ರ ಸರ್ಕಾರಗಳ ಅರಣ್ಯ ಕಾಯ್ದೆ ಉಲ್ಲಂಘನೆ ಮಾಡಲು ಕುಮ್ಮಕ್ಕು ನೀಡುತ್ತಿದ್ದಾರೆ.

 

ಪ್ರಾಮಾಣಿಕ ಅಧಿಕಾರಿಗಳನ್ನು ಎತ್ತಂಗಡಿ ಮಾಡಿಸುವ ಜೊತೆಗೆ ಸ್ಥಾನಿಕ ಅಧಿಕಾರಿಗಳ ಮೇಲೆ ಸಚಿವರು ಒತ್ತಡ ಹೇರುತ್ತಾರೆ. ಕಾನು, ಜಾಡಿ, ಗೋಮಾಳ, ಬೆಟ್ಟ ಮೊದಲಾದ ಕಂದಾಯ ಅರಣ್ಯಗಳನ್ನು ಅರಣ್ಯೇತರ ಉದ್ದೇಶಕ್ಕೆ ಬಳಸಲು ಆದೇಶಿಸುತ್ತಾರೆ’ ಎಂದು ಗುರುವಾರ ಇಲ್ಲಿ ಸುದ್ದಿಗೋಷ್ಠಿಯಲ್ಲಿ  ವೃಕ್ಷಲಕ್ಷ ಆಂದೋಲನದ ಅಧ್ಯಕ್ಷ ಅನಂತ ಅಶೀಸರ ಅವರು ಆರೋಪಿಸಿದರು.

 

‘ಹಿರಿಯ ರಾಜಕೀಯ ಮುಖಂಡರಾಗಿ, ಮಲೆನಾಡಿನ ಮಣ್ಣಿನ ಮಗನಾಗಿ ಅರಣ್ಯ ನಾಶ ಮಾಡಲು ಪ್ರಚೋದನೆ ನೀಡುವುದು ಅಕ್ಷಮ್ಯ ಅಲ್ಲವೇ’ ಎಂದು ಸಚಿವರನ್ನು ಪ್ರಶ್ನಿಸಿದ್ದಾರೆ. 

 

‘ಇಂದಿನ ಜಲಕ್ಷಾಮ ಮತ್ತು ಬರಗಾರಲದ ಸ್ಥಿತಿಯನ್ನು ಅರಿತು ಎಲ್ಲೆಡೆ ಹಸಿರೀಕರಣ ಹಾಗು ಜಲಸಂವರ್ಧನೆಗೆ ಹೆಚ್ಚಿನ ಆದ್ಯತೆ ನೀಡುವ ಬದಲಾಗಿ ಅರಣ್ಯ ನಾಶ ಮಾಡಲು ಹೊರಟಿರುವುದನ್ನು ರಾಜಕೀಯ ಪಕ್ಷಗಳು, ಸಾರ್ವಜನಿಕರು ಖಂಡಿಸಬೇಕು. 

 

ಶಿವಮೊಗ್ಗದ ಪಶ್ಚಿಮಘಟ್ಟ ಉಳಿಸಿ ಆಂದೋಲನದ ಸಂಚಾಲಕ ಪ್ರೊ. ಬಿ.ಎಂ. ಕುಮಾರಸ್ವಾಮಿ, ವಿಜ್ಞಾನಿಗಳಾದ ಟಿ.ವಿ. ರಾಮಚಂದ್ರ, ಸುಭಾಸ್‌ಚಂದ್ರನ್, ಸಸ್ಯಶಾಸ್ತ್ರಜ್ಞ ಕೇಶವ ಕೊರ್ಸೆ, ಬೆಂಗಳೂರು ಸಮಗ್ರವಿಕಾಸ ಸಂಘಟನೆ ಅಧ್ಯಕ್ಷ ವೈ.ಬಿ. ರಾಮಕೃಷ್ಣ, ಸಾಗರ ವಿಜ್ಞಾನ ಕೇಂದ್ರದ ಸಂಚಾಲಕ ಕೆ. ವೆಂಕಟೇಶ, ಕುಮಾರಧಾರ ಪರಿಸರ ಸಮಿತಿಯ ಕರುಣಾಕರ ಗೋಗಟೆ, ಪರಿಸರವಾದಿಗಳಾದ ಗಜೇಂದ್ರ ಗೊರಸುಕುಡಿಗೆ, ಶಾಂತಾರಾಮ ಸಿದ್ದಿ ಅವರು ಸಚಿವರ ಹೇಳಿಕೆಯನ್ನು ವಿರೋಧಿಸಿದ್ದಾರೆ’ ಎಂದು ಹೇಳಿದರು. 
 

‘ಶಾಲೆ– ಕಾಲೇಜುಗಳಲ್ಲಿ ದಿನಪತ್ರಿಕೆ ಓದುವ ಮಕ್ಕಳಿಗೆ ಸಚಿವರ ಇಂತಹ ಹೇಳಿಕೆ ಗೊಂದಲ ಸೃಷ್ಟಿಸಬಹುದು. ಸರ್ಕಾರ ಮಕ್ಕಳಿಗ ವನ ದರ್ಶನ ಕಾರ್ಯಕ್ರಮ ಹಮ್ಮಿಕೊಳ್ಳುವ ಮೊದಲು ಸಚಿವರಿಗೆ ಪರಿಸರ ರಕ್ಷಣೆಯ ಅರಿವು ಮೂಡಿಸಬೇಕು’ಎಂದು ಪರಿಸರ ಬರಹಗಾರ ಶಿವಾನಂದ ಕಳವೆ ಹೇಳಿದರು.