ರೈತರ ಖಾತೆಗೆ ಬಾರದ ತೊಗರಿ ಹಣ

‘ಮಾ.1ರಿಂದಲೇ ತೊಗರಿ ತಂದಿದ್ದೇವೆ. ಆದರೆ, ಖರೀದಿ ಮಾಡಿದ ಹಣ ರೈತರಿಗೆ ಜಮೆ ಮಾಡುವಲ್ಲಿ ರಾಜ್ಯ ಸಹಕಾರಿ ಮಾರಾಟ ಮಹಾಮಂಡಳಿ ವಿಳಂಬ ನೀತಿ ಅನುಸರಿಸುತ್ತಿದೆ’ ಎಂದು ರೈತರು ಆಪಾದಿಸಿದ್ದಾರೆ. 

 

‘ತೊಗರಿ ರಾಶಿ ಮಾಡಿ ಎರಡು ತಿಂಗಳಾಯಿತು. ಖರೀದಿ ಕೇಂದ್ರದ ಮುಂದೆ ಸರದಿಯಲ್ಲಿ ನಿಂತು ತೊಗರಿ ಮಾರಾಟ ಮಾಡಿದ್ದೇವೆ. ಆದರೆ, ಒಂದೂವರೆ ತಿಂಗಳಾದರೂ ಖಾತೆಗೆ ಹಣ ಜಮೆಯಾಗಿಲ್ಲ. ಮನೆಯಲ್ಲಿ ಮಕ್ಕಳ ಮದುವೆ ನಿಶ್ಚಯ ಮಾಡಿದ್ದೇವೆ. ಹಣ ಇಲ್ಲದೆ ಮುಂದೇನು ಮಾಡಬೇಕು ಎಂಬುದು ತಿಳಿಯುತ್ತಿಲ್ಲ’ ಎಂದು ರೈತ ಮುದಪ್ಪ ತಿಳಿಸಿದರು. 

 

ಇದು ಕೇವಲ ಮುದಕಪ್ಪನ ತೊಂದರೆಯಲ್ಲ. ಹಲವಾರು ರೈತರು ಇಂತಹ ತೊಂದರೆಯನ್ನು ಅನುಭವಿಸುತ್ತಿದ್ದಾರೆ. ಮದುವೆ, ಮುಂಜಿ, ತೊಟ್ಟಿಲು ಕಾರ್ಯಕ್ರಮಗಳನ್ನು ಇಟ್ಟುಕೊಂಡಿದ್ದಾರೆ. ಆದರೆ, ಹಣ ಸಿಗದೆ ಕಂಗಾಲಾಗಿದ್ದಾರೆ.

 

‘15 ದಿನಗಳಲ್ಲಿ ಹಣ ಬರುತ್ತದೆ ಎಂಬ ವಿಶ್ವಾಸದಿಂದ ತೊಗರಿ ಮಾರಿದ್ದೇವೆ. ಹಲವು ತಿಂಗಳು ಕಳೆದರೂ ಹಣ ಜಮೆ ಆಗಿಲ್ಲ. ಮೊದಲು ತೊಗರಿ ಖರೀದಿ ಮಾಡುವಂತೆ ಹೋರಾಟ ಮಾಡಬೇಕಾಯಿತು. ಈಗ ಹಣ ಪಡೆಯಲು ಹೋರಾಟ ನಡೆಸಿದ್ದೇವೆ’ ಎಂದು ಗ್ರಾಮ ಪಂಚಾಯಿತಿ ಮಾಜಿ ಅಧ್ಯಕ್ಷ ಸಾಯಬಣ್ಣ ದೊಡಮನಿ ಆರೋಪಿಸಿದರು. 

 

‘ಏ.22ರವರೆಗೆ ತೊಗರಿ ಖರೀದಿಗೆ ಅವಕಾಶ ನೀಡಲಾಗಿದೆ. ಆದರೆ, ಪ್ರತಿರೈತರಿಂದ ಕೇವಲ 25 ಕ್ವಿಂಟಲ್ ಮಾತ್ರ ಖರೀದಿಸುವ ಷರತ್ತು ವಿಧಿಸಿದೆ. ಹೆಚ್ಚು ತೊಗರಿ ಬೆಳೆದ ರೈತರು ಉಳಿದದ್ದನ್ನು ಎಲ್ಲಿ ಮಾರಬೇಕು’ ಎಂದು ಕರ್ನಾಟಕ ರಾಜ್ಯ ರೈತಸಂಘ ಹಾಗೂ ಹಸಿರುಸೇನೆಯ ಜಿಲ್ಲಾ ಘಟಕದ ಅಧ್ಯಕ್ಷ ಬಸನಗೌಡ ಚಿಂಚೋಳಿ ಪ್ರಶ್ನಿಸಿದರು.

 

‘ಸರ್ಕಾರದ ನೀತಿಯಿಂದ ರೈತರು ಆದಾಯ ಕಳೆದುಕೊಳ್ಳಲಿದ್ದಾರೆ. ಆದ್ದರಿಂದ ಮಿತಿ 50 ಕ್ವಿಂಟಲ್‌ಗೆ ಏರಿಸಬೇಕು’ ಎಂದು ಅವರು ಒತ್ತಾಯಿಸಿದರು. 

‘ಸರ್ಕಾರದ ಆದೇಶದಂತೆ ತೊಗರಿ ಖರೀದಿಸಿ ರೈತರಿಗೆ ರಸೀದಿ ನೀಡಿದ್ದೇವೆ. ಹಣ ಜಮೆ ಮಾಡುವುದು ರಾಜ್ಯ ಸಹಕಾರ ಮಾರಾಟ ಮಹಾಮಂಡಳದ ಜವಾಬ್ದಾರಿ. ರೈತರು ಅಲ್ಲಿಯೇ ಕೇಳಬೇಕು’ ಎಂದು ಡಿಸಿಸಿ ಬ್ಯಾಂಕ್ ನಿರ್ದೇಶಕ ಬಾಪುಗೌಡ ಯಾಳಗಿ ಹೇಳಿದರು.

****

ರೈತರ ಬ್ಯಾಂಕ್ ಖಾತೆಗಳಿಗೆ ತೊಗರಿ ಖರೀದಿಸಿದ ಹಣ ಶೀಘ್ರ ಜಮೆ ಮಾಡಬೇಕು. ಇಲ್ಲದಿದ್ದರೆ ರೈತರೊಂದಿಗೆ ಪ್ರತಿಭಟನೆ ನಡೆಲಾಗುವುದು
ಬಸನಗೌಡ ಚಿಂಚೋಳಿ, ಅಧ್ಯಕ್ಷ, ರಾಜ್ಯ ರೈತ ಸಂಘ ಹಾಗೂ ಹಸಿರು ಸೇನೆ