ಸಂಗೀತ ಪರಂಪರೆಯ ಮನೆತನದಿಂದ ಬಂದ ಅಂಬಿ ಸುಬ್ರಹ್ಮಣ್ಯಂ ಅವರಿಗೆ ಪಿಟೀಲಿನ ಮೇಲೆ ಅಪಾರ ಪ್ರೀತಿ. ಬೆಂಗಳೂರಿನವರೇ ಆದ ಇವರಿಗೆ ಬಾಲ್ಯದಿಂದಲೂ ಕಲೆ ಒಲಿದಿತ್ತು. ತಂದೆ ಎಲ್.ಸುಬ್ರಹ್ಮಣ್ಯಂ, ತಾಯಿ ಬಾಲಿವುಡ್ ಹಿನ್ನೆಲೆ ಗಾಯಕಿ ಕವಿತಾ ಕೃಷ್ಣಮೂರ್ತಿ ಇಬ್ಬರ ಪ್ರತಿಭೆಯೂ ಮಗನಿಗೂ ಒಲಿದಿತ್ತು. ಹಾಗಾಗಿ ಸಹಜವಾಗಿ ಇವರಲ್ಲೂ ಸಂಗೀತದ ಆಸಕ್ತಿ ಒಡಮೂಡಿತ್ತು. ಪಿಟೀಲು ಇವರ ನೆಚ್ಚಿನ ವಾದ್ಯ.
ಮೂರನೇ ವಯಸ್ಸಿನಿಂದಲೇ ಅಂಬಿ ಅವರ ಸಂಗೀತಾಭ್ಯಾಸ ಆರಂಭವಾಯಿತು. ತಂದೆಯೇ ಗುರು. ಆರು ವರ್ಷದವರಿದ್ದಾಗ ಮೊದಲ ಬಾರಿ ವೇದಿಕೆ ಏರಿ ಪಿಟೀಲು ನುಡಿಸಿದ್ದರು. ‘ನನ್ನ ಮೊದಲ ಹಾಗೂ ಕೊನೆಯ ಗುರು ನನ್ನ ತಂದೆಯೇ. ಆದರೆ ಗಾಯನ ಮತ್ತು ಪಿಟೀಲು ನುಡಿಸಾಣಿಕೆಯನ್ನು ಬೇರೆ ಶಿಕ್ಷಕರಿಂದ ಕಲಿತಿದ್ದೆ’ ಎಂದು ತಮ್ಮ ಕಲಿಕೆಯ ಹಾದಿಯನ್ನು ಚಿಕ್ಕದಾಗಿ ಹೇಳುತ್ತಾರೆ.
ಎಂ.ಎಸ್. ಸುಬ್ಬುಲಕ್ಷ್ಮಿ ಹಾಗೂ ತಂದೆ ಎಲ್. ಸುಬ್ರಹ್ಮಣ್ಯಂ ಇವರ ಸಂಗೀತ ಕಲೆಗೆ ಸ್ಫೂರ್ತಿ. ಮೊದಲೆಲ್ಲಾ ವೇದಿಕೆ ಏರಿ ಹಾಡುತ್ತಿದ್ದ ಇವರು ಇತ್ತೀಚೆಗೆ ಹಾಡುವುದನ್ನು ಕಡಿಮೆ ಮಾಡಿದ್ದಾರೆ. ಕಳೆದ ಇಪ್ಪತ್ತು ವರ್ಷಗಳಿಂದ ಅನೇಕ ಕಾರ್ಯಕ್ರಮಗಳನ್ನು ನೀಡುತ್ತಲೇ ಬಂದಿದ್ದಾರೆ. ವಿದೇಶಗಳಲ್ಲೂ ಕಾರ್ಯಕ್ರಮಗಳನ್ನು ನೀಡಿ ಸೈ ಎನಿಸಿಕೊಂಡಿದ್ದಾರೆ.
ಎಂ.ಬಿ.ಎ ಪದವಿ ಮುಗಿಸಿ, ಸಂಗೀತದಲ್ಲಿ ಪಿ.ಎಚ್ಡಿ ಮಾಡಿದ್ದಾರೆ ಅಂಬಿ. ‘ಸಂಗೀತಕ್ಕೆ ತಂದೆ– ತಾಯಿ ಸಹಕಾರ ಮುಂಚಿನಿಂದಲೂ ಇತ್ತು, ಆದರೆ ಅದರ ಜೊತೆಗೂ ಓದಿಗೂ ಪ್ರಾಮುಖ್ಯ ನೀಡಿದ್ದರು. ನನ್ನ ಸಹೋದರಿ ಕೂಡ ಸಂಗೀತದಲ್ಲಿ ಭವಿಷ್ಯ ಕಟ್ಟಿಕೊಂಡವರು. ನಾನು ಈಗ ಇರುವುದರಲ್ಲೇ ಸಂತೋಷವಾಗಿದ್ದೇನೆ, ಹಾಗಾಗಿ ಹೊಸತೊಂದು ಯೋಜನೆಯ ಬಗ್ಗೆ ಯೋಚಿಸುವುದಿಲ್ಲ’ ಎಂದು ನೆಮ್ಮದಿಯ ಮಾತುಗಳನ್ನು ಆಡುತ್ತಾರೆ. ಸಾಪಾ (ಸುಬ್ರಹ್ಮಣಿಂ ಅಕಾಡೆಮಿ ಆಫ್ ಪರ್ಫಾಮಿಂಗ್ ಆರ್ಟ್) ಎನ್ನುವ ಸಂಗೀತ ಶಾಲೆಗೆ ಇವರು ಸಹ ನಿರ್ದೇಶಕರಾಗಿದ್ದಾರೆ. ‘ಸಾಪಾ’ ಮೂಲಕ ಶಾಲಾ ಮಕ್ಕಳಿಗೆ ಸಂಗೀತವನ್ನು ಕಲಿಸುವ ಕಾಯಕದಲ್ಲಿ ತೊಡಗಿಸಿಕೊಂಡಿದ್ದಾರೆ. ಈವರೆಗೆ ಸುಮಾರು 20,000 ಮಕ್ಕಳಿಗೆ ಸಂಗೀತಭ್ಯಾಸ ಮಾಡಿಸಿದ್ದಾರೆ.
Lok Sabha Elections Results 2024 |ನರೇಂದ್ರ ಮೋದಿ ಅವರ 'ವಿಕಸಿತ ಭಾರತ' ಅಥವಾ ರಾಹುಲ್ ಗಾಂಧಿ ಅವರ ಇಂಡಿಯಾ ಐಕ್ಯ ಭಾರತ? ಜಗತ್ತಿನ ಅತಿದೊಡ್ಡ ಪ್ರಜಾಪ್ರಭುತ್ವದ 18ನೇ ಲೋಕಸಭೆಗೆ ನಡೆದ ಚುನಾವಣೆ ಫಲಿತಾಂಶದ ಕ್ಷಣ ಕ್ಷಣದ ಮಾಹಿತಿ, ವಿಶ್ವಾಸಾರ್ಹ ವಿಶ್ಲೇಷಣೆ, ಅಂಕಿ ಅಂಶಗಳಿಗಾಗಿ ಪ್ರಜಾವಾಣಿ ನೋಡಿ. ಇದರ ಜೊತಗೆ, ಆಂಧ್ರಪ್ರದೇಶ ಮತ್ತು ಒಡಿಶಾ ವಿಧಾನಸಭೆ ಚುನಾವಣೆಯ ಫಲಿತಾಂಶವೂ ಇಲ್ಲೇ ಲಭ್ಯ. ಪ್ರಜಾವಾಣಿಯನ್ನು ವಾಟ್ಸ್ಆ್ಯಪ್, ಎಕ್ಸ್, ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂನಲ್ಲಿ ಫಾಲೋ ಮಾಡಲು ಮರೆಯದಿರಿ.