ಮತ್ತೆ 200ಕ್ಕೂ ಹೆಚ್ಚು ಭಾರತೀಯರು ವಾಪಸ್‌

ನವದೆಹಲಿ (ಪಿಟಿಐ): ಸಂಘರ್ಷ ಪೀಡಿತ  ಇರಾಕ್‌ನ ನಜಾಫ್‌ನಿಂದ 200ಕ್ಕೂ ಅಧಿಕ ಭಾರತೀಯರು ಇರಾಕ್‌ ಏರ್‌ವೇಸ್‌ನ ವಿಶೇಷ ವಿಮಾನದಲ್ಲಿ ಭಾನುವಾರ ಬೆಳಿಗ್ಗೆ ಸ್ವದೇಶಕ್ಕೆ ಮರಳಿದ್ದಾರೆ.

201 ಭಾರತೀಯರನ್ನು ಹೊತ್ತ ಇರಾಕ್‌ ಏರ್‌ವೇಸ್‌ನ ವಿಮಾನ ನಸುಕಿನ ಜಾವ 4:30ರ ಸುಮಾರಿಗೆ ಇಲ್ಲಿಗೆ ಬಂದಿಳಿದಿದೆ.

ಇನ್ನೆರಡು ದಿನಗಳಲ್ಲಿ ಮತ್ತಷ್ಟು ಪ್ರಯಾಣಿಕರು ಏರ್‌ ಇಂಡಿಯಾ ಸೇರಿದಂತೆ ವಿಶೇಷ ವಿಮಾನಗಳ ಮೂಲಕ ಭಾರತಕ್ಕೆ ಹಿಂದಿರುಗುವ ನಿರೀಕ್ಷೆಗಳಿವೆ.

ಇನ್ನೆರಡು ದಿನಗಳಲ್ಲಿ ಇರಾಕ್‌ನಿಂದ ಸುಮಾರು 600 ಭಾರತೀಯರು ಸ್ವದೇಶಕ್ಕೆ ವಾಪಸ್ಸಾಗಲಿದ್ದಾರೆ ಎಂದು ವಿದೇಶಾಂಗ ಸಚಿವಾಲಯ ಶನಿವಾರವಷ್ಟೇ ಹೇಳಿತ್ತು.