ಫತೇ ಹೈದರಾಬಾದ್ ತಂಡಕ್ಕೆ ಜಯ

 

ಅಂತಿಮ ಹಂತ ತಲುಪಲು ಗೆಲ್ಲಲೇ ಬೇಕಾದ ಪಂದ್ಯದಲ್ಲಿ ಓಜೋನ್ ಎಫ್‌ಸಿ ತಂಡ  1–2 ಗೋಲುಗಳಲ್ಲಿ ಫತೇ ಹೈದರಾಬಾದ್ ಎದುರು ಸೋಲು ಕಂಡಿದೆ. 

 

ಈ ಸೋಲಿನಿಂದ ಓಜೋನ್ ತಂಡ ‘ಸಿ’ ಗುಂಪಿನಲ್ಲಿ ಏಳು ಪಾಯಿಂಟ್ಸ್‌ಗಳಿಂದ ಮೂರನೇ ಸ್ಥಾನದಲ್ಲಿದೆ. ಹೈದರಾಬಾದ್ ಒಂಬತ್ತು ಪಾಯಿಂಟ್ಸ್‌ಗಳಿಂದ ಅಗ್ರ ಸ್ಥಾನಕ್ಕೆ ಏರಿದೆ. ಅಲ್ಲದೇ ಅಂತಿಮ ಸುತ್ತಿಗೆ ಲಗ್ಗೆಯಿಟ್ಟಿದೆ. 

 

ಫೆಬ್ರುವರಿ 24 ರಂದು ನಡೆಯುವ ಅಂತಿಮ ಲೀಗ್ ಪಂದ್ಯದಲ್ಲಿ ಓಜೋನ್ ತಂಡ ಮುಂಬೈ ಕೆಂಕ್ರೆ ವಿರುದ್ಧ ಆಡಲಿದೆ. ಈ ಪಂದ್ಯದಲ್ಲಿ ಗೆದ್ದರೂ ಓಜೋನ್ ತಂಡದ ಅಂತಿಮ ಹಂತ ತಲುಪುವ ಹಾದಿ ಕಠಿಣವಾಗಿದೆ. ಇತರ ತಂಡಗಳ ಫಲಿತಾಂಶದ ಮೇಲೆ ಓಜೋನ್‌ ಭವಿಷ್ಯ ನಿರ್ಧಾರವಾಗಲಿದೆ.

 

ಪಂದ್ಯದ ಮೂರನೇ ನಿಮಿಷದಲ್ಲಿ ನಿಖಿಲ್‌ ಬರ್ನಾರ್ಡ್‌ ಓಜೋನ್ ತಂಡದ ಮೊದಲ ಗೋಲು ತಂದುಕೊಟ್ಟರು. 

 

23ನೇ ನಿಮಿಷದಲ್ಲಿ ಹೈದರಾಬಾದ್ ತಂಡದ ನೊಂಗ್‌ಮಿದೆಮ್ ಸಿಂಗ್ ಹೆಡರ್ ಮಾಡುವ ಮೂಲಕ ಗೋಲು ಗಳಿಸಿ ಸಮಬಲ ಮಾಡಿಕೊಂಡರು. 

 

ಹೈದರಾಬಾದ್ ತಂಡದ ಅಗ್ರಗಣ್ಯ ಆಟಗಾರ ಆ್ಯಂಟೊ ಕ್ಸೇವಿಯರ್ 40ನೇ ನಿಮಿಷದಲ್ಲಿ ಚೆಂಡನ್ನು ಗುರಿ ಸೇರಿಸಿ ಗೆಲುವು ತಂದುಕೊಟ್ಟರು.