ಭಾರತ ತಂಡದ ಅಭ್ಯಾಸ ಆರಂಭ

ಭುವನೇಶ್ವರ: ಮುಂದಿನ ತಿಂಗಳ ಒಂದರಿಂದ ಇಲ್ಲಿ ನಡೆಯಲಿರುವ ವಿಶ್ವ ಹಾಕಿ ಲೀಗ್ ಫೈನಲ್‌ನಲ್ಲಿ ಆಡಲಿರುವ ಭಾರತ ತಂಡದವರು ಗುರುವಾರ ಅಭ್ಯಾಸ ಆರಂಭಿಸಿದರು.

ಈ ಹಂತದಲ್ಲಿ ಆಟಗಾರರು ವೇಗ ಮತ್ತು ತಂತ್ರಗಳನ್ನು ಮೈಗೂಡಿಸಿಕೊಳ್ಳುವುದಕ್ಕೆ ಹೆಚ್ಚು ಮಹತ್ವ ನೀಡಿದರು. ಕೋಚ್‌ ಶೊರ್ಡ್ ಮ್ಯಾರಿಜ್ ಅವರ ಮಾರ್ಗದರ್ಶನದಲ್ಲಿ ಪಳಗಿರುವ ತಂಡ ಒಂದು ತಾಸು ದೈಹಿಕ ಕಸರತ್ತು ನಡೆಸಿದ ನಂತರ ಅರ್ಧ ತಾಸು  ಪಂದ್ಯವೊಂದನ್ನು ಆಡಿದರು.

‘ಬಿ’ ಗುಂಪಿನಲ್ಲಿರುವ ಭಾರತ ಡಿಸೆಂಬರ್ ಒಂದರಂದು ಮೊದಲ ಪಂದ್ಯದಲ್ಲಿ ಹಾಲಿ ಚಾಂಪಿಯನ್‌ ಆಸ್ಟ್ರೇಲಿಯಾವನ್ನು ಎದುರಿಸಲಿದೆ.