ಅರಸು ಸರಸು ಇಬ್ಬರು ಸೇರಿ
ನಡೆಸಿದರೊಂದು ಸಂವಾದ
ಟೀವಿ ಸಿನಿಮಾ ಯಾವುದು ಹೆಚ್ಚು?
ಬೆಳದೇ ಬೆಳೆಯಿತು ವಾಗ್ವಾದ
`ಸಿನಿಮಾದಲ್ಲಿ ದೊಡ್ಡದು ಸ್ಕ್ರೀನು
ತಲೆಯೆತ್ತಲೆ ಬೇಕು ಎಂಥವನು
ಪುಟ್ಟದು ಒಂದು ಚೀಲವೆ ಸಾಕು
ತುಂಬಲು ಟೀವಿ ಸೆಟ್ಟನ್ನು!'
ಅರಸು ವಾದಕೆ ಸರಸು ಸೆಟೆದಳು
`ಆಫ್ ಮಾಡಲು ಆಗದು ಸಿನಿಮಾನ
ಆಡ್ತಾ ಓದ್ತಾ ನೋಡಲುಬಹುದು
ಮುದ್ದಿನ ಪುಟಾಣಿ ಟೀವೀನ!
ಸಿನಿಮಾ ಕತೆ ಒಂದೇನೆ ಎಳೆವರು
ಉದ್ದಕೆ ತಲೆಚಿಟ್ಟು
ಚಾನೆಲ್ ಚಾನೆಲ್ ಕತೆ ಬೇರೇನೆ
ಬೇಸರವೆಲ್ಲಾ ಚಟ್ಟು'
`ಟೀವಿ ನೋಡ್ತಾ ಕೂತುಬಿಟ್ರೆ
ಬರೇ ಡಿಸ್ಟರ್ಬೆನ್ಸು
ಫೋನಿನ ರಿಂಗು ಟ್ರಿಣ್ ಟ್ರಿಣ್
ಕಾಲಿಂಗ್ ಬೆಲ್ಲು ಟ್ರಣ್ ಟ್ರಣ್'
`ಟೀವಿ ಚಾನೆಲ್ ಬದಲಿಸಬಹುದು
ಎಷ್ಟೇ ಬಾರಿ ಮತ್ತೆ ಮತ್ತೆ
ಕೂತ ಜಾಗ ಬದಲಿಸಬಹುದು
ದಿಂಬು ಹಾಸಿಗೆ ಮತ್ತೆ!'
`ಟೀವಿ ಮುಂದೆ ಉಣ್ಣಲೆ ಬೇಕು
ಜಾಹಿರಾತಿನ ಕಹಿಯನ್ನು
ಮುಗಿಸುವುದಿಲ್ಲ ಯಾವುದೆ ಚಾನಲ್
ಧಾರಾವಾಹಿ ಕತೆಯನ್ನು!'
ಸರಸು ಮೇಲಕೆ ಹಾರಿದಳು
ಗಡಸು ದನಿಯಲಿ ಗುಡುಗಿದಳು
`ಕಾರ್ಟೂನ್ ನೆಟ್ವರ್ಕ್ ಬಲು ಚೆಂದ
ಅನಿಮಲ್ ಪ್ಲಾನೆಟ್ ಬಲು ಅಂದ
ಪೋಗೋ ಮುಂದೆ ಸಿನಿಮಾನೆ?
ಹೋಗೋ ಹೋಗೋ'
ತಂಗಿಯ ಮಾತು ಪುಂಗಿಯ ಹಾಗೆ
ಅಣ್ಣನು ಬಾಗಿದ ಹಾವಿನ ಹಾಗೆ!
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.