ಬೆಳದಿಂಗಳಲ್ಲಿ ಕಂಡ ಅಮಾವಾಸ್ಯೆಯ ಚಿತ್ರಗಳು

1
ಅಮ್ಮನ
ಸಿಲ್ವಾರದ ತಟ್ಟೆಯ ಮೇಲೆ
ನಾನು
ಕಲ್ಲಿಜ್ಜಲಿನಿಂದ ಬರೆದ
ನನ್ನದೇ ಕನಸುಗಳು
ಈ ಹುಣ್ಣಿಮೆಯ ಬೆಳದಿಂಗಳಲ್ಲಿ
ಕಾಣುತ್ತಿದೆ ನನಗೆ
ಅವರಿವರ ಕೆಂಗಣ್ಣ ಉರಿಯಲ್ಲಿ
ಸುಟ್ಟು ಕರಿಕಲಾದ
ನನ್ನಪ್ಪ ಅವ್ವಂದಿರ
ಜೀವಂತ ಶವಗಳಂತೆ!

2
ಅಮ್ಮನ
ಗುಡಿಸಲ ಗೋಡೆ
ಗೂಡುಗಳ ಸುತ್ತೆಲ್ಲಾ
ಗೂಡು ಕಟ್ಟಿರುವ ನವುಲುಗಳ
ಕೆಮ್ಮಣ್ಣ ಚಿತ್ತಾರ
ಈ ಬೆಳದಿಂಗಳ ಬೆಳಕಲ್ಲಿ
ಕಾಣುತ್ತಿದೆ ನನಗೆ
ನೆತ್ತರಲೇ ಅದ್ದಿ ತೆಗೆದಂತೆ!
ಅವಳೇ ಬಿಡಿಸಿರುವ
ಮರಿ ನವುಲ ಸಂತತಿ
ಸರ್ಪಗಳ ಬಾಯಿಗೆ
ಸಿಕ್ಕಿ ಬಿಕ್ಕುತ್ತಿರುವಂತೆ

3
ಗುಡಿಸಲ ತಡಿಕೆಯ ಹಿಂದೆ
ತಳಮಳಗೊಂಡು
ತಲೆಬಾಗಿ ಕುಂತಿರುವ
ಅವಳ ಪ್ರಾಯಕ್ಕೆ ಬಂದ ಮಗಳ
ಎದೆಯ ಮೇಲಿನ ಸೆರಗು
ಕಣ್ಣ ಒಳಗಿನ ಕನಸು
ಎಲ್ಲವೂ ರಕ್ತಸಿಕ್ತವಾದಂತೆ
ಕಾಣುತ್ತಿದೆ ನನಗೆ
ಆ ಬೆಳದಿಂಗಳ ರಾತ್ರಿಯಲ್ಲಿ!