ರೂಪಕಗಳ ನಡು ನಡುವೆ

ಸಂತೆಯಲ್ಲಿ ನಿಂತ ಕಬೀರ
ಎನ್ನುವುದೊಂದು ಬರಿಯ ರೂಪಕ
ಸಂತೆ, ಕಬೀರ ಎರಡೂ ನಾಮ ಪದಗಳೇ
ನಾಮ ವಿಶೇಷಣಗಳಿಲ್ಲದ ವಿಶೇಷಗಳೇ

ಆದರೂ

ಸಂತೆಯನ್ನೇ ಒಂದು ರೂಪಕವನ್ನಾಗಿಸಿರುವ
ಈ ಆಧುನಿಕ ಮಾಲುಗಳ ಬೀದಿಯಲ್ಲಿ
ವ್ಯಾಪಾರಕ್ಕಿಂತಲೂ ಘನಂದಾರಿ ಐಷಾರಾಮಿ
ಅಗತ್ಯಕ್ಕಿಂತಲೂ ಐಲು ಫೈಲಿನ ಹರಾಮಿ
ಸಂತೆಯನ್ನೇ ಬೊಂತೆ ಕಟ್ಟಿ ಎಸೆಯುತ್ತಿರುವಾಗ

ನಿಜದ ರೂಪಕವಾಗಬೇಕಿರುವ ಕಬೀರನಿಗೋ
ತನ್ನ ಮಗ್ಗದ ಲಾಳಿ ಸಡಿಲವಾಗುತ್ತಿರುವ ಶಂಕೆ
ಸಂತೆಯ ಹೊತ್ತಿಗೆ ಮೂರು ಮೊಳ ನೇಯುವ ಅನಿವಾರ್ಯ
ತುತ್ತಿನ ಚೀಲ ಸರಿಹೊಂದಿಸುವ ಬಿರುಸು
ವ್ಯಾಪಾರ, ಪರಭಾರೆ, ವಿನಿಮಯ
ಅವನ ನಿಘಂಟಿಗಂಟದ ಶಬ್ದ ತೀರ
ಲೌಕಿಕದ ವ್ಯವಹಾರಕ್ಕೆ ಸಾವಿರದ ಹೆಸರು

ಅದಕ್ಕೇ ಮತ್ತೆ ಮತ್ತೆ ಅನಿಸುವುದು

ಸಂತೆಯಲ್ಲಿ ನಿಂತ ಒಬ್ಬಂಟಿಗರನ್ನೆಲ್ಲ
ಕಬೀರ ಎನ್ನುವ ಈ ಹುಂಬರಿಗೆ
ಸಂತೆಯ ಅನಿವಾರ್ಯದ ತುರ್ತಾಗಲೀ
ಕಬೀರನೆಂಬ ರೂಪಕದ ಅರ್ಥವಾಗಲೀ

ಸುಲಭಕ್ಕೆ ಒಗ್ಗುವುದಿಲ್ಲ
ಅದಕ್ಕೇ ಅವರೂ ಬದಲಾಗುವುದಿಲ್ಲ.