ಡಾ.ಜಿ.ಎಸ್. ಶಿವಪ್ರಸಾದ್ ಅವರ ಕವನ ‘ಆಶಯಗಳು’

ಭರವಸೆಗಳ ಹೂಮಾಲೆಯನು
ತೊಡಿಸಬೇಕು ಅವಳಿಗೆ
ಹಣತೆಗಳನು ಹಚ್ಚಬೇಕು
ಅವಳು ನಡೆವ ದಾರಿಗೆ

ನಕ್ಷತ್ರಗಳನು ಹಿಡಿದು ತಂದು
ಸಿಂಗರಿಸಬೇಕು ಅವಳನು
ಅವಳ ಎದೆಯ ಆಳಕಿಳಿದು
ಕೂಗ ಬೇಕು ಹೆಸರನು

ನಾನು ನುಸಿಳಿ ಸೇರಬೇಕು
ಅವಳ ಬಣ್ಣದ ಕನಸಿಗೆ
ಅವಳ ಹೆಜ್ಜೆ ಗೆಜ್ಜೆ ಸದ್ದು
ಲಯವು ನನ್ನ ಕವಿತೆಗೆ

ನನ್ನ ಪುಟ್ಟ ಅರಮನೆಯಲಿ
ರಾಣಿ ಪಟ್ಟ ಅವಳಿಗೇ
ನಾ ಕಟ್ಟಿದರೆ ಕಟ್ಟಬೇಕು
ತಾಳಿ ಅವಳ ಕೊರಳಿಗೇ

ಹೊಸ ದಿಗಂತಗಳನು ದಾಟಬೇಕು
ನಾನು-ಅವಳು ಒಟ್ಟಿಗೆ
ತೇಲಿ ತೇಲಿ ಹೋಗಬೇಕು
ಕಡಲ ನೀಲಿ ಅಂಚಿಗೆ