ದೂರದಲ್ಲೆಲ್ಲೋ ಗಮನ ಸೆಳೆಯುವ
ನಕ್ಷತ್ರ ರಾಶಿ, ಫುಟ್ಬಾಲು ಆಟ,
ಬೆಳಕಿನ ದಿಬ್ಬಣ, ಇನ್ನೆಲ್ಲೋ
ಸಮರಕ್ಕೆ ನಿಂತ ಕ್ರೌಂಚ ಪಕ್ಷಿಯ ಅನುರಣನ
ಆಟದಲ್ಲಿ ಸೋತ ಕೂಡಲೇ
ಚಿತ್ತ ಚಂಚಲನಾದ ಪೆಂತೇರಿ ರೆಫರಿ
ಮೂಳೆಯೊಳಗಿನ ಮೇಣ
ಚಿನ್ನದಂತೆ ಕುದಿಸುತ್ತಿದ್ದಾನೆ ಹುಡುಗ
ಸುಮ್ಮನೆ ಕೆಣಕುತ್ತಿವೆ ಸೊಕ್ಕಿನ ಇಲಿಗಳು
ಕಿಟಕಿ ತೆರೆದೇ ಇದ್ದರೂ
ಗಾಳಿ ಹಿಡಿದಿಟ್ಟುಕೊಂಡಿದೆ ಬಾಗಿಲನ್ನು
ಇನ್ನಷ್ಟು ಗಟ್ಟಿಯಾಗುತ್ತಿದೆ ಅವನ ಎದೆಯ ಕಂಬನಿ
ಯಾರವರು ಬೇರೆ ಮಾಡಿದವರು
ಆ ಸರಸರ ಈಜುವ ಹುಡುಗನನ್ನು
ಸೈಕಲ್ಲು ಏರಿ
ಸೂರ್ಯನನ್ನು ಪಡಸಾಲೆಗೆ ತಂದು ಕೂರಿಸಿದವನನ್ನು
ಬಳಪದಿಂದ ಆತ್ಮ ಶುದ್ಧಿ ಎಂದವನನ್ನು
ಯಾರು ದಸ್ತಗಿರಿ ಮಾಡಿಸಿದವರು
ಲಕ್ಷ ಲಕ್ಷ ಮಿಂಚು ಹುಳ ನುಂಗಿದವನನ್ನು
ಕೀಟ ಕ್ರಿಮಿಗಳ ಪಾದಯಾತ್ರೆಗೆ
ವಿಷ ಕಾಯಿಸುವ ಎದೆಯ ಜ್ವಾಲೆಯ
ಗೂಡು ಕೆಂಪಾಗಾಗಿದೆ
ಚೆಂಡು ಹೊದೆಯುವ ಕಾಳಗಕ್ಕೆ
ನಿಮ್ಮ ತಲೆಗಳನ್ನೆ ಬಳಸಿಕೊಳ್ಳುವನು
ಆ ಎದೆ ಸೆಟೆದು ನಿಂತ ಹುಡುಗ
ಕೊನೆಗೆ ಹಠಮಾರಿಯನ್ನು
ನೀವು ಕೊಲ್ಲಬಹುದು ಗೆಲ್ಲಲಾಗುವುದಿಲ್ಲ
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.