ನಂದಿನಿ ಹೆದ್ದುರ್ಗ ಅವರ ಕವನ: ಸತ್ಯದ ಫ್ಯಾಕ್ಟರಿ

ತಯಾರಾಗುತ್ತಿದೆ ಸತ್ಯ

ಅವರ ಫ್ಯಾಕ್ಟರಿಯಲ್ಲಿ

ಅವರ ಸತ್ಯ

ಇವರ ಫ್ಯಾಕ್ಟರಿಯಲ್ಲಿ

ಇವರ ಸತ್ಯ

ಇನ್ನೆಲ್ಲೊ ಇನ್ನಾರದ್ದೊ ಸತ್ಯ

ಬೇಡಿಕೆಗೂ ಮೀರಿ

ಮಾರುಕಟ್ಟೆಗೆ ಅವಕ

ನಿಶ್ಚಿತ ಧಾರಣೆ ಕುಸಿತ 

ಎಂದೋ ತಯಾರಿಸಿಟ್ಟು

ತುಕ್ಕು ಬರಲಾರಂಭಿಸಿದ್ದ

ಮಚ್ಚು ಪಿಸ್ತೂಲುಗಳಿಗೆ

ನೆತ್ತರ ವಾಸನೆ ಹೊಡೆದು

ಆಕಳಿಸುತ್ತಾ ಮಗ್ಗುಲು

ಬದಲಿಸುತ್ತಿವೆ

ಕಣ್ಣುಗಳ ಎಬ್ಬಿ ತೆಗೆದಾದ

ಮೇಲೆ ಮೃಗದ ಕಣ್ಣು

ಬಾಯಿ ಹರಿದಾದ ಮೇಲೆ

ಹಾವಿನ ನಾಲಿಗೆ

ಬುರುಡೆ ಒಡೆದಾದ‌ ಮೇಲೆ

ಖಾಲಿ ಗೋಲ ಸ್ಥಾಪಿಸಿಕೊಂಡವರಷ್ಟೇ

ಉಳಿದಿದ್ದೇವೆ ಇಲ್ಲಿ

ಎಷ್ಟೊಂದು ಮಂದಿ

ಪ್ರವಾದಿಗಳಿದ್ದಾರೆ  ನಮ್ಮ ನಡುವೆ

ನಿಯಮಗಳ ಸುಡುವೆ

ಎನ್ನುವವರು!

ಏನೂ‌ ಬದಲಿಸಲಾಗದೆ ಹೋದಾಗ

ಬಾಡಿಗೆ ಕಳ್ಳರ ಸಹಾಯ ಪಡೆದು

ಉತ್ಪನ್ನಗಳ ಅದಲುಬದಲು

ಮಾಡಿಸುವವರು!!

ತಾಳ್ಮೆಯಿಂದಿರಿ  ಮಹಾಜನಗಳೆ

ಮಚ್ಚು ಪಿಸ್ತೂಲುಗಳು

ಒಬ್ಬರಿನ್ನೊಬ್ಬರ ಮುಗಿಸಿಕೊಂಡು

ಕೊನೆಯಲ್ಲಿ ಯಾರೂ ಸಿಗದೆ

ತಮ್ಮವರನ್ನೇ ಕೊಲ್ಲುತ್ತವೆ

ಹಾಗಾಗುವುದೂ

ಪೂರ್ವಜನ್ಮದ ಸುಕೃತವೇ ಇರಬೇಕು

ಅಗೋ

ಪ್ರವಾದಿಗಳು ಬಂದರು

ವೇದಿಕೆ  ತೆರವು ಮಾಡಿ