ನಾ ದಿವಾಕರ ಅವರ ಕವಿತೆ: ಶಾಯಿ ಖಾಲಿಯಾಗಿಲ್ಲ

ನಾನು ಬರೆಯುತ್ತಲೇ ಇರುತ್ತೇನೆ
ನನ್ನೊಳಗಿನ
ಹುಟ್ಟು ಕಲ್ಮಷ ತೊಳೆಯಲು
ಮಲಿನ ಧಾತುಗಳನಳಿಸಲು
ಅನಿಷ್ಟ ನೆರಳುಗಳ ಸರಿಸಲು ;

ನಾನು ಬರೆಯುತ್ತಲೇ ಇರುತ್ತೇನೆ
ಪರಿಕಲ್ಪಿತ
ಶುದ್ಧಾಶುದ್ಧತೆಯಳಿಸಲು
ಜಾತಿ ಸೋಂಕು ತೊಳೆಯಲು
ಬಣ್ಣದ ಹಂಗು ತೊರೆಯಲು ;

ನಾನು ಬರೆಯುತ್ತಲೇ ಇರುತ್ತೇನೆ
ಸುತ್ತಲಾವರಿಸಿಹ
ಕಾರ್ಗತ್ತಲನಳಿಸಲು
ಶ್ರೇಷ್ಠತೆಯಹಮಿಕೆ ಅಳಿಸಲು
ನಂದಿದ ಹಣತೆಗಳನುರಿಸಲು ;

ನಾನು ಬರೆಯುತ್ತಲೇ ಇರುತ್ತೇನೆ
ಅಳಿಸಿಹೋದ
ಸಹನೆಯ ಬೀಜ ಬಿತ್ತಲು
ವಿಶ್ವಪಥವನು ಕಟ್ಟಲು
ಮನುಜಮತವನು ಬೆಳೆಸಲು ;