ಆರ್‌ಬಿಐನಿಂದ ಅಲ್ಪಾವಧಿ ಸಾಲದ ಬಡ್ಡಿ ದರ ಕಡಿತ

ಮುಂಬೈ (ಪಿಟಿಐ): ಮೂರು ವರ್ಷಗಳ ತರುವಾಯ ಇದೇ ಮೊದಲ ಬಾರಿಗೆ ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್‌ಬಿಐ) ಅಲ್ಪಾವಧಿ ಸಾಲದ ಮೇಲಿನ ಬಡ್ಡಿ ದರವನ್ನು ಶೇಕಡ 0.50 ರಷ್ಟು ಕಡಿತ ಮಾಡಿದ್ದು, ಇದರಿಂದ ಗೃಹ, ಆಟೋಮೊಬೈಲ್ ಹಾಗೂ ಕಾರ್ಪೋರೆಟ್ ಸಾಲಗಳು ಸುಲಭ ದರದಲ್ಲಿ ಲಭ್ಯವಾಗಲಿವೆ.

ಮಂಗಳವಾರ ವಾರ್ಷಿಕ ಹಣಕಾಸು ನೀತಿ ಬಿಡುಗಡೆ ಮಾಡಿ ಮಾತನಾಡಿದ ಆರ್‌ಬಿಐನ ಗವರ್ನರ್ ಡಿ.ಸುಬ್ಬರಾವ್ ಅವರು ~ದೇಶದ ಆರ್ಥಿಕತೆ ಚೇತರಿಕೆಗೆ ಹಾಗೂ 2008ರ ಜಾಗತೀಕ ಆರ್ಥಿಕ ಬಿಕ್ಕಟ್ಟಿಗೆ ಮುಂಚಿನ ಶೇಕಡ 9ರ ಬೆಳವಣಿಗೆ ದರವನ್ನು ಪುನಃ ಉತ್ತೇಜಿಸುವ ಉದ್ದೇಶದಿಂದ ರಿಪೋ ದರ ಇಳಿಕೆ ಮಾಡಲಾಗಿದೆ~ ಎಂದು ಹೇಳಿದರು.