ಕಚ್ಚಾ ತೈಲ ಬೆಲೆಯಲ್ಲಿ ಏರಿಕೆ

ಸಿಂಗಪುರ (ಎಎಫ್‌ಪಿ): ಕಳೆದ ಕೆಲವು ದಿನಗಳಿಂದ ಏಷ್ಯಾ ಮಾರುಕಟ್ಟೆ­ಯಲ್ಲಿ ಇಳಿಮುಖವಾಗಿದ್ದ  ಕಚ್ಚಾ ತೈಲ ಬೆಲೆ ಮಂಗಳವಾರ ಚೇತರಿಕೆ ಹಾದಿಗೆ ಮರಳಿದೆ. ಅಮೆರಿಕ ಬೆಂಚ್‌ಮಾರ್ಕ್‌ನ ವೆಸ್ಟ್‌ ಟೆಕ್ಸಾಸ್‌ ಇಂಟರ್‌ಮೀಡಿಯೇಟ್‌ (ಡಬ್ಲ್ಯುಟಿಐ) ದರ್ಜೆ ಕಚ್ಚಾ ತೈಲದ ಬೆಲೆ 32 ಸೆಂಟ್‌ಗಳಷ್ಟು ಹೆಚ್ಚಿದ್ದು, ಬ್ಯಾರೆಲ್‌ಗೆ 49.91 ಡಾಲರ್‌­ನಷ್ಟಾಗಿದೆ. ಬ್ರೆಂಟ್‌ ಕಚ್ಚಾ ತೈಲವೂ ಕೂಡಾ 77 ಸೆಂಟ್‌ಗಳಷ್ಟು ಏರಿಕೆಯಾಗಿದ್ದು, ಬ್ಯಾರೆಲ್‌ಗೆ 60.31 ಡಾಲರ್‌ಗೆ ತಲುಪಿದೆ.

ಅಮೆರಿಕದಲ್ಲಿ ಪ್ರಮುಖ ಮೂರು ತೈಲ ಸಂಸ್ಕರಣಾಗಾರದ ಕಾರ್ಮಿಕರು ಮುಷ್ಕರ ಕೈಬಿಡಲು ನಿರ್ಧರಿಸಿರು­ವುದರಿಂದ ಬೆಲೆಯಲ್ಲಿ ಏರಿಕೆ ಕಾಣುತ್ತಿದೆ ಎಂದು ವಿಶ್ಲೇಷಕರು ಹೇಳಿದ್ದಾರೆ. ವೇತನ ಹೆಚ್ಚಳ ಮಾಡುವಂತೆ ಮತ್ತು ಸಂಶೋಧನಾಗಾರದಲ್ಲಿ ಸೂಕ್ತ ಸುರಕ್ಷತೆ ಕಲ್ಪಿಸುವಂತೆ ಒತ್ತಾಯಿಸಿ ರಾಯಲ್‌ ಡಚಸ್‌ ಶೆಲ್‌ ಸಮೂಹದ ಪ್ರಮುಖ ಮೂರು ತೈಲ ಸಂಶೋಧನಾಗಾರದಲ್ಲಿನ 5 ಸಾವಿರಕ್ಕೂ ಅಧಿಕ ಕಾರ್ಮಿಕರು ಫೆಬ್ರುವರಿ 1ರಿಂದ ಮುಷ್ಕರ ಆರಂಭಿಸಿದ್ದರು.

ಕಾರ್ಮಿಕರೊಂದಿಗೆ ಮಾತುಕತೆ ನಡೆಸಿದ್ದು, ಬೇಡಿಕೆ ಈಡೇರಿಸುವ ಭರವಸೆ ನೀಡದೆ. ಹೀಗಾಗಿ ಬುಧವಾರದಿಂದ ಕೆಲಸಕ್ಕೆ ಹಾಜರಾ­ಗಲು ಕಾರ್ಮಿಕರು ಒಪ್ಪಿದ್ದಾರೆ ಎಂದು ರಾಯಲ್‌ ಡಚಸ್‌ ಶೆಲ್‌ ತಿಳಿಸಿದೆ.