ವಾಣಿಜ್ಯ ಸಮರ ತಪ್ಪಿಸುವ ಯತ್ನ: ಚೀನಾಕ್ಕೆ ಅಮೆರಿಕದ ಕಾರ್ಯದರ್ಶಿ

ಬೀಜಿಂಗ್‌: ವಿಶ್ವ ವಾಣಿಜ್ಯ ಸಮರ ತಪ್ಪಿಸುವ ಉದ್ದೇಶದಿಂದ ಅಮೆರಿಕದ ವಾಣಿಜ್ಯ ಕಾರ್ಯದರ್ಶಿ ವಿಲ್ಬರ್‌ ರೋಸ್‌ ಅವರು ಶನಿವಾರ ಚೀನಾಕ್ಕೆ ಭೇಟಿ ನೀಡಿದ್ದಾರೆ ಎಂದು ಚೀನಾದ ಮಾಧ್ಯಮಗಳು ಹೇಳಿವೆ.

ರೋಸ್‌ ಅವರು ಭಾನುವಾರದವರೆಗೆ ಅಮೆರಿಕದಲ್ಲಿರಲಿದ್ದಾರೆ ಎಂದು ಅಮೆರಿಕ ಸರ್ಕಾರದ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಜಗತ್ತಿನಲ್ಲಿ ವಾಣಿಜ್ಯ ಸಮರ ಆರಂಭವಾಗುವ ತೀವ್ರತೆ ಹೆಚ್ಚಾಗುತ್ತಿರುವುದರಿಂದ ಅವರು ಈ ಭೇಟಿ ನೀಡಿದ್ದಾರೆ ಎನ್ನಲಾಗಿದೆ.

ಜಗತ್ತಿನ ಅತಿ ದೊಡ್ಡ ಎರಡು ಆರ್ಥಿಕ ಶಕ್ತಿಗಳು ಗರಿಷ್ಠ ಪ್ರಮಾಣದಲ್ಲಿ ಆಮದು ಸುಂಕ ವಿಧಿಸುವ ಪೈಪೋಟಿಗೆ ಬಿದ್ದಿರುವುದರಿಂದ ವಾಣಿಜ್ಯ ಸಮರ ಆರಂಭವಾಗುವ ಆತಂಕ ಎದುರಾಗಿದೆ ಎಂದು ಹೇಳಿದೆ.

ಮೇ ತಿಂಗಳಿನಲ್ಲಿ ಉಭಯ ದೇಶಗಳು ಕೆಲವು ಒಪ್ಪಂದಗಳನ್ನು ಮಾಡಿಕೊಳ್ಳುವುದಾಗಿ ಘೋಷಿಸಿದ್ದರೂ, ಚೀನಾದಿಂದ ಆಮದಾಗುವ ಸರಕುಗಳಿಗೆ ವಿಧಿಸುವ ಆಮದು ಸುಂಕದ ಬಗ್ಗೆ ಜೂನ್‌ 15 ರಂದು ಅಮೆರಿಕ ಸರ್ಕಾರ ಘೋಷಿಸಲಿದೆ. ಪ್ರಸ್ತಾವಿತ ಹೂಡಿಕೆ ನಿರ್ಬಂಧ ಮತ್ತು ರಫ್ತು ಮಿತಿಯ ಬಗ್ಗೆ ಜೂನ್ 30 ರಂದು ಹೊರಬೀಳಲಿವೆ ಎಂದು ಶ್ವೇತಭವನ ಹೇಳಿದೆ. ಅಮೆರಿಕದ ವಾಣಿಜ್ಯ ಕಾರ್ಯದರ್ಶಿ ಭೇಟಿಯಿಂದ ಚೀನಾದ ಅಸಮಾಧಾನ ತುಸು ತಗ್ಗುವ ಸಾಧ್ಯತೆ ಇದೆ ಎಂದು ಮಾಧ್ಯಮಗಳು ಹೇಳಿವೆ.

‘ಸಂಧಾನ ಮಾತುಕತೆಗೆ ಚೀನಾದ ಬಾಗಿಲು ಸದಾ ತೆರೆದಿರಲಿದೆ. ಎರಡೂ ದೇಶಗಳು ಮಾತುಕತೆ ಮತ್ತು ಸಲಹೆ ಮೂಲಕ ಪರಿಹಾರ ಕಂಡುಕೊಳ್ಳುವುದು ಸೂಕ್ತ’ ಎಂದು ವಿದೇಶಾಂಗ ಸಚಿವಾಲಯದ ವಕ್ತಾರೆ ಹುವಾ ಚುನಿಯಾಂಗ್‌ ಹೇಳಿದ್ದಾರೆ.