ಶಾಲೆಗಳ ನಿರ್ಮಾಣಕ್ಕೆ ₹2 ಸಾವಿರ ಕೋಟಿ ದೇಣಿಗೆ: ಅದಾನಿ ಸಮೂಹ

ನವದೆಹಲಿ: 20 ಶಾಲೆಗಳ ನಿರ್ಮಾಣಕ್ಕೆ ₹2 ಸಾವಿರ ಕೋಟಿ ದೇಣಿಗೆ ನೀಡಲಾಗುವುದು ಎಂದು ಅದಾನಿ ಸಮೂಹವು ಸೋಮವಾರ ಘೋಷಿಸಿದೆ.

ಉದ್ಯಮಿ ಗೌತಮ್ ಅದಾನಿ ಅವರು ತಮ್ಮ ಕಿರಿಯ ಪುತ್ರನ ವಿವಾಹ ಸಮಾರಂಭದಲ್ಲಿ ₹10 ಸಾವಿರ ಕೋಟಿಯನ್ನು ಸಾಮಾಜಿಕ ಕಾರ್ಯಕ್ಕೆ ಬಳಸಲಾಗುತ್ತದೆ ಎಂದು ಹೇಳಿದ್ದರು.

ಈ ಹಿಂದೆ ಆಸ್ಪತ್ರೆಗಳ ನಿರ್ಮಾಣಕ್ಕೆ ₹6 ಸಾವಿರ ಕೋಟಿ ಮತ್ತು ಕೌಶಲ ಅಭಿವೃದ್ಧಿಗಾಗಿ ₹2 ಸಾವಿರ ಕೋಟಿ ದೇಣಿಗೆಯನ್ನು ಘೋಷಿಸಿತ್ತು.

ಅದಾನಿ ಸಮೂಹದ ಅದಾನಿ ಫೌಂಡೇಶನ್, ದೇಶಾದ್ಯಂತ ಶಿಕ್ಷಣದ ಸಂಸ್ಥೆಗಳನ್ನು ಸ್ಥಾಪಿಸಲು ಜಾಗತಿಕವಾಗಿ ಮುಂಚೂಣಿಯಲ್ಲಿರುವ ಜಿಇಎಂಎಸ್ ಎಜುಕೇಶನ್‌ನೊಂದಿಗೆ ಸಹಯೋಗ ಹೊಂದಿದೆ. ಮುಂದಿನ ಮೂರು ವರ್ಷಗಳಲ್ಲಿ, ಕೆ -12 ವಿಭಾಗದಲ್ಲಿ ಕನಿಷ್ಠ 20 ಶಾಲೆಗಳನ್ನು ಪ್ರಾರಂಭಿಸಲಾಗುವುದು ಎಂದು ಸಮೂಹ ತಿಳಿಸಿದೆ.