ಅಶೋಕ್‌ ಲೇಲ್ಯಾಂಡ್‌ ಮಾರಾಟ ಹೆಚ್ಚಳ

ಬೆಂಗಳೂರು: ‘2018–19ರ ಏಪ್ರಿಲ್‌–ಡಿಸೆಂಬರ್‌ ಅವಧಿಯಲ್ಲಿ ಲಘು ವಾಣಿಜ್ಯ ವಾಹನ (ಎಲ್‌ಸಿವಿ) ಮಾರಾಟ ಶೇ 34ರಷ್ಟು ಪ‍್ರಗತಿ ಕಂಡಿದೆ’ಎಂದು ಅಶೋಕ್‌ ಲೇಲ್ಯಾಂಡ್‌ ಅಧ್ಯಕ್ಷ ನಿತಿನ್‌ ಸೇಥಿ ತಿಳಿಸಿದ್ದಾರೆ.

‘ಸಂಸ್ಥೆಯ ಬೆಳವಣಿಗೆಯ ಹಾದಿಯ ಕುರಿತು ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಬೆಂಗಳೂರನ್ನೂ ಒಳಗೊಂಡು ಎಲ್ಲಾ ಪ್ರದೇಶಗಳಿಂದಲೂ ನಮ್ಮ ವಾಹನಗಳಿಗೆ ಉತ್ತಮ ಸ್ಪಂದನೆ ದೊರೆಯುತ್ತಿದೆ. ಹೀಗಾಗಿ ಡೀಲರ್‌ಶಿಪ್‌ ಮತ್ತು ಸೇವಾ ಜಾಲವನ್ನು ವಿಸ್ತರಣೆ ಮಾಡಲಾಗುತ್ತಿದೆ. ಎಲೆಕ್ಟ್ರಾನಿಕ್ ಸಿಟಿ ಸಮೀಪ ಹೊಸೂರು ರಸ್ತೆಯ ಬಳಿ ಹೊಸ ಎಲ್‌ಸಿವಿ ಡೀಲರ್‌ಶಿಪ್‌ ಕೇಂದ್ರ ಆರಂಭಿಸಲಾಗಿದೆ. ಇದರಿಂದ ರಾಜ್ಯದಲ್ಲಿ ಒಟ್ಟಾರೆ 11 ಡೀಲರ್‌ಶಿಪ್‌ ಕೇಂದ್ರಗಳನ್ನು ಹೊಂದಿದಂತಾಗಿದೆ’ ಎಂದು ಅವರು ಮಾಹಿತಿ ನೀಡಿದರು.

2020ರಲ್ಲಿ ಹೊಸ ಮಾದರಿ: ‘ಜಾಗತಿಕ ಮಟ್ಟದಲ್ಲಿ ಸಂಸ್ಥೆ ಮಾರಾಟ ಮಾಡುತ್ತಿರುವ ವಾಹನಗಳಲ್ಲಿ, ಎಲ್‌ಸಿವಿ ಪಾಲು ಶೇ 75ರಷ್ಟಿದ್ದು, ಇನ್ನುಳಿದ ಶೇ 25ರಷ್ಟನ್ನು ಮಧ್ಯಮ ಮತ್ತು ಭಾರಿ ವಾಹನಗಳು ಹೊಂದಿವೆ. ಭಾರತದಲ್ಲಿ ಶೇ 60ರಷ್ಟು ಎಲ್‌ಸಿವಿ ಹಾಗೂ ಶೇ 40ರಷ್ಟು ಮಧ್ಯಮ ಮತ್ತು ಭಾರಿ ವಾಹನಗಳದ್ದಾಗಿದೆ. ಹೊಸ ಎಲ್‌ಸಿವಿ ಅಭಿವೃದ್ಧಿಪಡಿಸುವ ನಿಟ್ಟಿನಲ್ಲಿ ಈಗಾಗಲೇ ₹ 400 ಕೋಟಿ ಹೂಡಿಕೆ ಪ್ರಕ್ರಿಯೆ ಆರಂಭವಾಗಿದೆ. 2020ರ ಏಪ್ರಿಲ್‌ನಿಂದ ಹೊಸ ಮಾದರಿಗಳನ್ನು ಪರಿಚಯಿಸಲಾಗುವುದು. ಈ ಮಾದರಿಗಳು ಯುರೋ–6 ಮಾನದಂಡಕ್ಕೆ ಅನುಗುಣವಾಗಿರಲಿವೆ’ ಎಂದರು.