80 ಎನ್‌ಪಿಎ ಖಾತೆಗಳು ‘ಬ್ಯಾಡ್‌ ಬ್ಯಾಂಕ್‌’ಗೆ?
ನವದೆಹಲಿ: ದೊಡ್ಡ ಮೊತ್ತದ 80 ಎನ್‌ಪಿಎ ಖಾತೆಗಳನ್ನು ಬ್ಯಾಂಕ್‌ಗಳು ‘ರಾಷ್ಟ್ರೀಯ ಆಸ್ತಿ ಪುನರ್‌ರಚನಾ ಕಂಪನಿ’ಗೆ (ಎನ್‌ಎಆರ್‌ಸಿಎಲ್‌) ವರ್ಗಾವಣೆ ಮಾಡುವ ಸಾಧ್ಯತೆ ಇದೆ. ಈ ಕಂಪನಿಯು ಜೂನ್‌ ತಿಂಗಳಿಂದ ಕೆಲಸ ಆರಂಭಿಸುವ ನಿರೀಕ್ಷೆ ಇದೆ.
2021–22ನೇ ಸಾಲಿನ ಬಜೆಟ್‌ನಲ್ಲಿ ಎನ್‌ಎಆರ್‌ಸಿಎಲ್‌ (ಅಥವಾ ಬ್ಯಾಡ್‌ ಬ್ಯಾಂಕ್‌) ಆರಂಭಿಸುವ ಘೋಷಣೆ ಮಾಡಲಾಗಿದೆ. ಮಾಮೂಲಿ ಬ್ಯಾಂಕ್‌ಗಳ ಎನ್‌ಪಿಎ ಖಾತೆಗಳನ್ನು ತನ್ನ ಸುಪರ್ದಿಗೆ ತೆಗೆದುಕೊಂಡು, ಸಾಲ ವಸೂಲಿಗೆ ಸಂಬಂಧಿಸಿದ ಮುಂದಿನ ಕ್ರಮಗಳನ್ನು ಬ್ಯಾಡ್‌ ಬ್ಯಾಂಕ್‌ ಕೈಗೊಳ್ಳುತ್ತದೆ.
ಬ್ಯಾಡ್‌ ಬ್ಯಾಂಕ್‌ಗೆ ವಹಿಸಲು ಗುರುತಿಸಿರುವ ಎನ್‌ಪಿಎ ಖಾತೆಗಳು ತಲಾ ₹ 500 ಕೋಟಿಗಿಂತ ಹೆಚ್ಚಿನ ಸಾಲ ಬಾಕಿ ಇರಿಸಿಕೊಂಡಿವೆ ಎಂದು ಮೂಲಗಳು ತಿಳಿಸಿವೆ. ಬ್ಯಾಡ್‌ ಬ್ಯಾಂಕ್‌ ಆರಂಭವಾದ ನಂತರ, ಒಟ್ಟು ₹ 2 ಲಕ್ಷ ಕೋಟಿಗಿಂತ ಹೆಚ್ಚಿನ ಮೌಲ್ಯದ ಎನ್‌ಪಿಎ ಖಾತೆಗಳು ಬ್ಯಾಂಕ್‌ಗಳಿಂದ ಬ್ಯಾಡ್‌ ಬ್ಯಾಂಕ್‌ಗೆ ವರ್ಗಾವಣೆ ಆಗುವ ನಿರೀಕ್ಷೆ ಇದೆ. ವಂಚನೆ ಎಂದು ಘೋಷಣೆ ಆಗಿರುವ ಖಾತೆಗಳು ಬ್ಯಾಡ್‌ ಬ್ಯಾಂಕ್‌ಗೆ ವರ್ಗಾವಣೆ ಆಗುವುದಿಲ್ಲ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.