ಐ.ಟಿ, ಆಟೊಮೊಬೈಲ್‌ ಷೇರು ಗಳಿಕೆ, ಸೆನ್ಸೆಕ್ಸ್ ಏರಿಕೆ

ಮುಂಬೈ: ಆಟೊಮೊಬೈಲ್‌, ಹಣಕಾಸು ಮತ್ತು ಐ.ಟಿ. ವಲಯಗಳ ಷೇರುಗಳ ಖರೀದಿಯು ಗುರುವಾರ ಬಿರುಸಿನಿಂದ ನಡೆಯಿತು. ಇದರಿಂದಾಗಿ ದೇಶದ ಷೇರುಪೇಟೆ ಸೂಚ್ಯಂಕಗಳು ಸತತ ಎರಡನೆಯ ದಿನವೂ ಏರಿಕೆ ದಾಖಲಿಸಿದವು.

ಕೋವಿಡ್–19 ಲಸಿಕೆಗಳ ಮೇಲಿನ ಬೌದ್ಧಿಕ ಆಸ್ತಿ ಹಕ್ಕುಗಳನ್ನು ತೆಗೆಯುವ ನಿಲುವಿಗೆ ಅಮೆರಿಕದ ಸರ್ಕಾರ ಬೆಂಬಲ ನೀಡಿದ್ದು ಮಾರುಕಟ್ಟೆಯಲ್ಲಿ ಉತ್ಸಾಹದ ವಾತಾವರಣ ನಿರ್ಮಾಣ ಆಗುವಂತೆ ಮಾಡಿತು. ಈ ಬೆಂಬಲವು ಕಾರ್ಯರೂಪಕ್ಕೆ ಬಂದರೆ ಭಾರತ ಹಾಗೂ ಇತರ ಕೆಲವು ದೇಶಗಳಲ್ಲಿ ಲಸಿಕೆ ನೀಡುವ ಪ್ರಕ್ರಿಯೆಗೆ ವೇಗ ಸಿಗಬಹುದು ಎಂಬ ಆಶಾವಾದ ಹೂಡಿಕೆದಾರರಲ್ಲಿ ಮೂಡಿದೆ ಎಂದು ವರ್ತಕರು ತಿಳಿಸಿದ್ದಾರೆ.

ಮುಂಬೈ ಷೇರುಪೇಟೆ ಸಂವೇದಿ ಸೂಚ್ಯಂಕವು 272 ಅಂಶ ಏರಿಕೆ ಕಂಡಿತು, ರಾಷ್ಟ್ರೀಯ ಷೇರುಪೇಟೆ ಸಂವೇದಿ ಸೂಚ್ಯಂಕ ನಿಫ್ಟಿ 106 ಅಂಶ ಏರಿಕೆ ಕಂಡಿತು. ಸೆನ್ಸೆಕ್ಸ್‌ನಲ್ಲಿ ಬಜಾಜ್ ಆಟೊ, ಎಚ್‌ಡಿಎಫ್‌ಸಿ, ಟೆಕ್ ಮಹೀಂದ್ರ, ಇನ್ಫೊಸಿಸ್, ನೆಸ್ಲೆ ಇಂಡಿಯಾ, ಮಾರುತಿ ಮತ್ತು ಟೈಟಾನ್ ಕಂಪನಿಯ ಷೇರುಗಳು ಏರಿಕೆ ಕಂಡವು.

ಅಮೆರಿಕದ ಡಾಲರ್ ಎದುರು 13 ಪೈಸೆ ಚೇತರಿಕೆ ಕಂಡ ರೂಪಾಯಿ ಮೌಲ್ಯ, ದಿನದ ವಹಿವಾಟಿನ ಅಂತ್ಯಕ್ಕೆ 73.78ಕ್ಕೆ ತಲುಪಿತು.