ಅಂಧರಿಗೆ ಕರೆನ್ಸಿ ಗುರುತಿಸಲು ಆ್ಯಪ್‌: ಬಿಡ್‌ ಕರೆದ ಆರ್‌ಬಿಐ

ನವದೆಹಲಿ: ಅಂಧರು ಕರೆನ್ಸಿ ನೋಟುಗಳನ್ನು ಸುಲಭವಾಗಿ ಗುರುತಿಸಲು ನೆರವಾಗುವ ಮೊಬೈಲ್‌ ಆ್ಯಪ್‌ ಅಭಿವೃದ್ಧಿಪಡಿಸಲು ಆರ್‌ಬಿಐ ಬಿಡ್‌ ಕರೆದಿದೆ.

ದೇಶದಲ್ಲಿರುವ ಒಟ್ಟಾರೆ 80 ಲಕ್ಷ ಅಂಧರಿಗೆ ಈ ಆ್ಯಪ್‌ನಿಂದ ಪ್ರಯೋಜನವಾಗಲಿದೆ ಎಂದು ಹೇಳಿದೆ.ಮೊಬೈಲ್‌ ಕ್ಯಾಮೆರಾ ಎದುರು ಇಡುವ ನೋಟಿನ ಚಿತ್ರವನ್ನು ಸೆರೆಹಿಡಿದು ಅದರ ಮುಖಬೆಲೆಯನ್ನು ಗುರುತಿಸುವಂತೆ ಆ್ಯಪ್‌ ಅಭಿವೃದ್ಧಿಪಡಿಸಬೇಕಿದೆ.

ನೋಟಿನ ಚಿತ್ರ ಸ್ಪಷ್ಟವಾಗಿ ಸೆರೆಯಾದರೆ, ಧ್ವನಿಯ ಮೂಲಕವೂ ಅದು ಯಾವ ಮುಖಬೆಲೆಯ ಕರೆನ್ಸಿ ಎನ್ನುವುದನ್ನು ತಿಳಿಸುವಂತಿರಬೇಕು. ಚಿತ್ರ ಸರಿಯಾಗಿ ಸೆರೆಯಾಗದೇ ಇದ್ದರೆ, ಸ್ಪಷ್ಟವಾಗಿ ತೆಗೆಯುವಂತೆ ಸೂಚನೆ ನೀಡುವಂತಿರಬೇಕು ಎಂದು ಹೇಳಿದೆ.